Los Dracs tenián pas una forma olimpica aqueste dimenge cò dels Gigants d’Huddersfield. L’adversari veniá de pèrdre 9 de las 10 darrièras partidas, de cambiar d’entraïnaire mas cò dels Sang e Aur quasiment una equipa se trapa a l’infirmariá.
 
Los Gigants metèron a profit los traucs dins la defensa catalana e faguèron pròva d’un realisme maximum per menar 24-6 a la pausa: lo capitani Casty per un ensag aviá ensajat de revelhar sos collègas, mas en doas minutas l’arbitre de tòca intervenguèt per faire refusar un ensag dels Dracs e validar una realizacion anglesa.
 
E lo segond temps foguèt de la meteissa farina. Los catalans se mostrèron nervioses e capitèron pas de pausar lor jòc. Los Gigants s’impausèron fin-finala 36-18.
 
Se caldrà pas mancar pels Dracs dins lo novèl desplaçament que los espèra dimenge cò del HullFC per assegurar una plaça dins los 4 primièrs abans las pelhòfas.
 
Leeds, ganhaire a HullKR 25-24, es just darrèr a 2 punts e los Rinoceròs seràn a Brutús lo 18 d’agost.
 
En Elita, es lo temps de la represa dels entraïnaments collectius e se ne sap pas mai sus las fòrças en preséncia. Los Carcassoneses se son tornats trapar dins un bon ambient a l’estadi aqueste dijòus 1èr d’agost amb l’escomesa de contunhar sul meteis ritme (lo doblat!) que la sason passada e de faire bona figura en Cup. Jogaràn dins un estadi renovat amb l’edificacion d’una tribuna tota novèla e tota bèla en plaça de las vièlhas popularas.
 
Doas partidas amicalas contra Palau e un estagi-comandò amb los paracasudistas del 3en RPIMA son al menut abans la Dimenjada magica dels 22 e 23 de setembre e una primièra confrontacion amb Pià.
 
Lo FC Lesinhan anóncia lo retorn de Tibaut Ancelí dels Dragonets, l’arribada de dos pilièrs estrangièrs : l’internacional tongian David Fifita e lo jamaïcan Bryan Lamont, la signatura de dos Pianencs: Antòni Carrère e John Boudebza. Lo preparator fisic serà aquel de l’equipa de França Guilhèm Olivièr, qu’òbra amb los Dracs fins al mes d’octòbre.
 
A Limós, l’entraïnament es fisat a Marc Borrèl de retorn al club aprèp s’èsser ocupat del XV de Castèlnòu d’Arri e a Malik Boudjerra que secondava ja Danièl Wagon l’an passat.
 
Tolosa serà tornarmai en corsa dins 4 competicions: lo campionat e la Copa de segur, mas tanben la Northern Rail Cup e la Cup.
 
Per remplaçar Kevin Larroyer partit als Dracs, an fait signat l’espèr de Vilanòva Masselot. Comptan sus l’apòrt del Lesinhanés, passat pels Dracs, Florian Quintilla e van faire signar un arrièr estrangièr. Al plan internacional, la Federacion Europèa aculhís una novèla federacion: aquela de las illas de Caraïbas, Trinidad e Tobagò. Quand l’alièr d’aquel país d’esprintaires prendrà lo trauc, caldrà aver bonas cambas per l’agantar!