Bandièra01 1180x150: Comuna de Tolosa

Actualitats

Reüssida del vòte ecologista dins la region de Sivens

La zòna qu’a viscut una lucha emblematica contra la construccion d’una restanca es plan conscientizada amb l’environament segon los resultats electorals

| Marion Quenut
Lo vòte ecologista a pojat considerablament a l’entorn del bòsc de Sivens, en Galhaqués, ont la lista Mond Novèl, amb Gérard Onesta en cap e amb lo sosten del Partit Occitan, a obtengut sos resultats mai nauts dins lo primièr torn de las eleccions regionalas, segon çò que publica La Dépêche.
 
A l’Illa, la comuna ont se deviá bastir lo barratge, la lista Mond Novèl a obtengut l’11,64% dels vòtes e, çò mai remarcable es encara, dins lo canton nomenat Vinhals e Bastidas la formacion occitanista e ecologista a atench lo 13,43%. A Castelnòu son còsta a còsta amb los socialistas amb un 15,87%, a Puègcèlsi an atench lo 18,75% e a Salvanhac an agut lo 17,41% dels vòtes just talonant la drecha d’LR. A Rabastens an obtengut lo 12,78% e al quite Galhac an obtengut l’11,73% amb lo sosten del Front d’Esquèrra.
 
En aquela zòna de Galhaqués, dempuèi novembre de 2013, un grop d’activistas an menat una lucha longa e dura contra lo projècte d’un barratge que prevesiá de negar 35 ectaras dins la zòna umida del Testet.
 
 
Una lucha ecologista, un activista mòrt
 
Cal remembrar que la lucha per preservar la valor ecologica del Testet a provocat un mòrt del costat dels ecologistas, lo jove tolosan Rémi Fraisse, que moriguèt la nuèch del 26 al 27 d’octòbre a causa d’una granada lançada pels gendarmas.
 
Per ara, poiriam dire que la lucha que los zadistas an menat dempuèi novembre de 2014 a ben capitat. Lo conselh general de Tarn a decidit de far pas la restanca prevista. Ara prepausa de far una restanca mai pichona.
 
 
Crisi dins l’estat francés
 
De fach, la mòrt de Rémi Fraisse a portat la crisi al govèrn francés. Las nombrosas susmautas que se son debanadas per tot l’estat francés, en seguida de la mòrt de l’estudiant de botanica, crèan un grand desaise dintre lo poder politic.
 
Lo govèrn francés a ensajat de reglar la mòrt del jove tolosan en enebissent l’usatge de las granadas e en suspendent los trabalhs del barratge, e atanben en ensajant de criminalizar los ecologistas en lucha. Mas un larg sector de la societat, los movements ecologistas e los partits d’esquèrra, an demandat la demission del ministre de l’interior, Bernard Cazeneuve, que se limitèt a prometre “de sancions se de fautas se son comesas”.
 
Fraisse foguèt tuat dins l’encastre de la repression d’una protèsta populara e pacifica contra la construccion d’una restanca dins la zòna umida del Testet, a Sivens (Galhaqués).
 
 
La justícia relaxèt los activistas jutjats
 
En setempre passat la justícia relaxèt los activistas que luchèron contra la Restanca de Sivens. Lo tribunal correccional d’Albi relaxèt la quasi-totalitat de las quinze personas que compareguèron per “participacion a un atropament” sus la ZAD del Testet (Galhaqués), çò rapòrta Reporterre. Èran acusats d’aver opausat una resisténcia durant l’evacuacion del 6 de març passat.
 
 
Lo projècte
 
La restanca prevista, d’un milion e mièg de mètres cubes d’aiga, deviá negar una partida de la Val de Tescon, en tot far desaparéisser 13 ectaras de zòna umida e un milion d’animals salvatges (de granhòtas, de peisses o de salamandras). Lo conselh general de Tarn citava lo Ministèri francés de l’Environament, segon lo qual la restanca auriá de vertuts ecologicas, cercant un “equilibri idrologic” de la zòna. Los ecologistas o cresián pas, s’opausavan al projècte e denonciavan qu’èra finançat per de fonzes publics per favorir solament d’interèsses privats. Revendicavan la preservacion de totas las 35 ectaras de zòna umida menaçadas per la restanca. Denonciavan que la tòca del projècte èra de favorizar l’agricultura intensiva e que, per tant, es un perilh per un centenat d’espècias “protegidas” dont cinc son ja declaradas menaçadas.
 
Segon lo conselh general de Tarn, la restanca es indispensabla per irrigar las tèrras agricòlas e se recrearà una autra zòna umida. Los opausants denóncian un projècte car que solament servirà a irrigar las tèrras d’un petit nombre d’esplechaires que practican l’agricultura intensiva.
 
L’occitanisme s’es mostrat majoritàriament contra la construccion de la restanca, levat lo Partit de la Nacion Occitana (PNO) e l’associacion lo Clusèl (que manifestèt en favor de la restanca).

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Reinat Matalòt VILANÒVA- LOBET
12.

Que mauparada! aqueli garrolhas que ne finísson pas. Pietadós imatge que nos balha l'occitanisme. Pensatz qu'un jorn tot aqueu monde parlarà d'una soleta votz ? Mi ven a mau de lo creire presentament. Tantotun sieu de tot en tot d'acòrdi embe Raimon : aquelu rompebalas de parlaponchuts avían ren de faire en aquela istòria.
Viva !

  • 5
  • 0
raimon
11.

#9 D'un ponch de vista occitanista, e en particular, d'un ponch de vista patriotic o nacionalista occitan, la posicion la mès coerenta es de sostenir la populacion autoctòna locala victima de las exactions de zadistas venguts plan sovent deu nòrd de Leira, nos cau defénder nòstre país còntra lo vandalisma de Franchimands venguts assabentar los païsanàs que sèm de çò qu'ei bon per nosautres. MDR que sia monde de Provença que nos explican qui a rason dins l'istòria, au lòc que ieu que demòri dins lo caire, coneissi d'estajans que m'an explicat çò qu'an vist, en particular lo comportament d'aquestes zadistas qui, per'mor d'un combat legitima, estimavan aver lo le dret de s'aprovisionar en panar dins los casaus o la especierias deu canton. Vaqui çò que m'an contat los deu canton de Rabastens, L'Isla-sus-Tarn, Galhac : t'an vist debarcar parla-ponchuts que t'an gaitat los estatjans locaus de naut, coma pepiòts, pas fotut d'empachar la construccion d'aqueste barratge, doncas mespresables, doncas trobavan normal de se servir dins lor casaus. E los que protestavan, lor crevavan los pneus. Son tarneses que m'an contat aquò, mentre que la premsa parlava puslèu de la mòrt d'aqueste praube Remesi Fraisse (sabi pas coma un Occitan s'es poscut daissar embarcar dins aqueste istòria... la màger part deus zadistas vénguèvan, parish, deu Nòrd, de Nòstra-Dòna de las Lanas o d'alhor)...

  • 6
  • 3
Alari Agen
10.

#9 non es lo mond que fan viure l'economia del pais e permeton d'idemorar que cal sostener

  • 8
  • 1
Domergue Sumien Ais de Provença
9.

#8 D'un ponch de vista occitanista, e en particular, d'un ponch de vista patriotic o nacionalista occitan, la sola posicion coerenta es de sostenir lei zadistas e de venerar la memòria Remèsi Fraisse car defendon un tròç de nòstre país còntra la destruccion.

  • 3
  • 9
Alari Agen
8.

#4 los zadistas podon èstre plan intencionats e pacifics mas tanben d'agitators professionals de cops violents

  • 8
  • 3

Escriu un comentari sus aqueste article