Una partida ont a calgut comptar los punts fins a la darrièra minuta e tres victòrias amplas, talas son las resultas en Elèit 1 d’aquesta jornada de campionat de XIII, jogada lo jorn del segond torn de las regionalas.
 
 
Adieu, manhac!
 
Dedicarem aquesta cronica a la memòria de Bernat Roques, comentator de las partidas de XIII (de las esquipas d’Elèit o de Federala d’Aude, dels Dracs) sus Ràdio Marselheta, mòrt aquesta setmana. Comentava totjorn amb vam, sapiéncia, compreneson e biais las partidas, totjorn prèst per escambiar e parlar de rugbi. Saludava son mond d’un: “Adieu, manhac!”. Sa votz nos manca ja. Al delà de la minuta de silenci sus totes los terrens tretzistas d’aquesta dimenjada, Bernat, t’oblidarem pas!
 
 
Olhada a Palau
 
Sant Estève XIII Catalan aviá pas presat la victòria de Palau dins lo primièr dèrbi. Aqueste dimenge, a Palau, los Dragonets ataquèron a fum la partida e menèron lèu 22-0 (20a minuta). Los Broncos s’acontentèron de reduire la marca en tota fin de partida per plegar: 60-12.
 
A Vilanuèva, pauc se’n manquèt d’assistir a la primièra victòria dels Laupards de la sason, mas Lesinhan conservèt l’avantage 21-18. Avinhon se mostrèt intractable sus sa pelena fàcia a Tolosa: 44-22.
 
A Domèc, los Tigres d’Albi joguèron sens complèxe, mas los Canaris los tenguèron a distància per servar lor invencibilitat: 34-14.
 
Al programa de la dimenjada, doas partidas dissabte, Tolosa-Carcassona (16h) e Albi-Limós (19h), e doas partidas dimenge, Lesinhan-Avinhon (15h) e Dragonets-Vilanuèva (15h30).
 
 
Torn de Copa per l’Elèit 2
 
Aquesta dimenjada, la Copa Lord Derby jòga son primièr torn amb quatre oposicions entre formacions d’Elèit 2: Vilagalhenc-Argon contra Lion; Carpentràs-La Reula; Sant Gaudenç-l’Escura; Tonens-Vilafranca de Roergue; una oposicion Nacionala 1-Elèit 2 amb Sant Laurenç de Salanca contra Montpelhièr; un pichon Pocet serà designat per la partida entre pensionaris de Nacionala 1 de Tolon e de Ferrals; Baó es ja qualificat, mercé al tiratge al sòrt, pels oitens de la dimenjada dels 23 e 24 de genièr ont las formacions d’Elèit 1 intraràn dins la competicion que sa finala n’es fixada al dissabte 16 d’abril a Carcassona.
 
 
Los Estats Units a la Copa del Mond
 
Aprèp una partida entre Jamaica e Canadà que s’acabèt sus una egalitat, mercé a una victòria sus Canadà 34-24, es la formacion dels Estats Units, entraïnada pel responsable de Leeds McDermott, que tornarà representar las Americas a la Copa del Mond de 2017.
 
 
 
 
Alan Roch