Bandièra01 1180x150: Comuna de Tolosa

Actualitats

País Nòstre participarà a la manifestacion sobeiranista catalana de l’11 de setembre

L’organizacion occitanista País Nòstre organiza un viatge amb de militants e de simpatizants a la manifestacion independentista catalana de l’11 de setembre. Segon País Nòstre, “ara, es l’ora de la mobilizacion per un estat catalan en Euròpa” après l’insuccès de la reforma estatutària de Catalonha. Aquel procès culminèt amb una grèva reduccion de l’autogovèrn facha pel Tribunal Constitucional espanhòl, çò que provoquèt una responsa per carrièras en julhet de 2010, amb una manifestacion colossala a Barcelona de mai d’un milion de personas. Lo recampament per Lengadòc serà  l’11 de setembre, amb lo despart a 6 oras del matin, a l’intrada Narbona Sud de l’autoestrada A9.


L’accion solidària de País Nòstre respond a la volontat de l’Assemblada Nacionala Catalana (ANC) de far que l’11 de setembre d’ongan venga una “mobilizacion istorica” per accelerar lo procès independentista catalan. Dins aquel sens, l’ANC considèra que se se capita una manifestacion de tres milions de personas, la secession serà immediata e inevitabla. Cal prene en compte que la comunautat autonòma de Catalonha e Aran a sèt milions d’abitants.
 
Del sieu costat, lo president de la Generalitat de Catalonha, Artur Mas, a demandat ièr  que lo pòble catalan transforme la revendicacion annala de l’11 de setembre en un clam en favor del pache fiscal que lo sieu govèrn reclama a Madrid. En fach, Mas s’es fixat lo mes de decembre coma tèrme per obténer una responsa del govèrn espanhòl a la siá proposicion financièra, que cèrca de metre fin a l’estofament economic de Catalonha. En foncion de la responsa de Madrid, Mas poiriá convocar d’eleccions anticipadas e se presentar amb un programa sobeiranista.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article