Lo jornal Segre, de l’encontrada de Lhèida (Catalonha), publicava abans ièr una nòva que causèt l’indignacion en Aran. “Las estacions repòrtan la nèu vèrs las zònas mai bassas per assegurar l’esquí”, çò ditz lo jornal dins un article entitolat “En esperant la nèu” illustrat amb una fòto d’un endrech sens nèu de l’estacion d’esquí de Vaquèira (Val d’Aran).
 
D’un costat, es verai que fa tròp de jorns que la nèu tomba pas e qu’en Catalonha las estacions d’esquí son chepicadas per la manca d’aquel element. Mas  la Val d’Aran es del costat nòrd dels Pirenèus, en Occitània, e sas estacions son ben ennevadas per assegurar la sason d’esquí.
 
Manca de sensibilitat per Aran? Manipulacion informativa? En tot cas los araneses defendon la principala resorsa economica del país, qu’a l’ora d’ara es lo torisme de la nèu.