Bandièra01 1180x150: Comuna de Tolosa

Actualitats

Iniciativa per Occitània demanda publicament una clarificacion al PNO

En seguida de prepauses islamofòbs e racistas manifestats per doas personas dins la revista del PNO e endacòm mai

Iniciativa per Occitània (IPO) a demandat publicament al Partit de la Nacion Occitana (PNO) una clarificacion, après remarcar de prepauses racistas e xenofòbs de doas personas publicats dins la revista del PNO, Lo Lugar, e endacòm mai.
 
Lo laboratòri politic occitan IPO considèra que l’occitanisme deu aver de valors “contra lo chauvinisme, contra lo racisme e contra tota forma de crispacion identitària” e afirma que son “revoltats e estabosits fàcia als discorses d’òdi contra los musulmans exprimits per certans membres del PNO e per certans redactors del Lugar, la revista del PNO”. En mai d’aquò IPO afirma: “lo PNO s’es mes dins una situacion impossibla e li demandam de clarificar sa posicion rapidament”.
 
IPO planh especificament l’islamofobia manifestada per doas personas dins la revista del PNO: Sèrgi Viaule e Pèire Pessamessa. Segon lo comunicat, “Dins lo Lugar nº114 (prima de 2015), p. 21, Pèire Pessamessa se descriu coma «ieu, islamofòb de totjorn» e afirma: «mancan pas lei rasons d’èstre islamofòb». Dins lo meteis numèro del Lugar, p. 35, Sèrgi Viaule escriu «Aquel concèpte [la libertat] es vengut lo motor de totas las societats umanas. Sols, d’aquesta passa, los musulmans ensajan de tornar enrèire e refusan aquel modèl. Ensajan de tornar als mites e a las practicas barbaras de l’Antiquitat.»”
 
Viaule es collaborador abitual de Jornalet ont publica d’articles d’opinion e de cronicas de libres sens se mostrar excessivament racista. Per contra, si qu’a mostrat una islamofobia obsessiva dins qualques comentaris a d’autres articles. Pessamessa tanben publica sovent de comentaris islamofòbs plens d’òdi sus Jornalet, mas amb un escaisnom. De còps la redaccion a degut moderar e escafar d’afirmacions qu’an passat l’òsca.
 
IPO afirma dins son comunicat que “l’islamofobia (l’òdi dels musulmans) es un òdi contra una partida de la nacion occitana, donc es una traïson del nacionalisme occitan”. E garda “espèr” que lo PNO aurà una responsa satisfasenta.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

ièu
29.

Ente es passat Mossur Viaule, per un còp qu'esperave lo sieu comentari?

  • 0
  • 0
ièu
28.

#10 jogetz subre los mots! Dins son acceptacion popularia qu'es bin aquò lo racisme... Òc ben, nos chau balajar lo PNO perque respectan pus gaire la pensada de Fontan e mai perque que fan vergonha d'a l'occitanisma!

  • 1
  • 1
jtou villeveyrac
27.

#15 Si compren plan dau esperar que tu me diges quand e coma me cau pensar, rigolar, repoutegar, me trufar e tot aquo ... En Occitania e pertot din lo monde ia de ideas que deven combatre tots ...

  • 2
  • 0
Tit
26.

La responsa de JP Hilaire sus Occitan Touareg es indigna e eludís otrajosament las questions de fons. Sembla la marca d'una complasença extrèma e fòrça sospiechosa per las paraulas xenofòbas e delictuosas de SV e PP que revela una linha politica del PNO pas clara sus aquelas questions.

  • 26
  • 8
O
25.

Macarèl !

Es aquo l'ambicion de la premsa occitana de se bregar entre happy few coma dins una cort d'escola ?
Es pas lo fons lo problèma - cal plan solide condemnar aqueles dos piots racistas e xenofobs del PNO, que dison de causas penalament condemnablas ! - mas es lo tractament de l'info (un article per aquo ??) e los comentaris... que son pietadoses. Tant val mai anar se penjar.
:-(

  • 5
  • 4

Escriu un comentari sus aqueste article