Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc BasCabardés

Una setmana en Cabardés

Dos rendètz-vos se crosan e se fan responsa en Cabardés entre lo dimars 19 de genièr e lo dimenge 24 de genièr: las Ivernalas e las Ampelofoliás

Ivernalas de Cabardés: paraulas de gigants
 
Del 19 al 23 de genièr, l’Institut d’Estudis Occitans d’Aude e lo Servici Cultural de Puègnautièr vos prepausan tres datas e quatre rendètz-vos per celebrar la lenga d’òc e lo terrador, en direccion de totes los publics, joves e adultes, gents d’aicí et gents d’endacòm mai: son las Ivernalas de Cabardés per se rescaufar amb los mots e los gèstes occitans.
 
Primièr rendètz-vos, lo dimars 19, a Argon (18h30, Ostal de Cabardés). Lo bar mesadièr de Fasètz la Lenga en Cabardés serà animat par Mirèlha Braç, autora de l’obratge culinari Afogassets e trufariás (ed. Letras d’Òc). Parlarà en detalh de la cosina de la rabassa negra.
 
Segond rendètz-vos, lo dimècres 20 de genièr, a Puègnautièr (Sala Na Loba, 18h30) amb Ives Seguièr, que presentarà un conte pel jove public (a partir de 6 ans) e per totes, Estève e los gigants: “Un jove gigant va veire la mameta per li desirar un bon anniversari. En camin, vira las paginas del Libre dels gigants e ne tira contes, contairòlas e cançons. Es un conte interactiu en francés e occitan”.
 
Lo dissabte 23 de genièr, a Puègnautièr, las Ivernalas coneisseràn dos tempses. D’en primièr, a 19h (Sala Na Loba), Arnaud Cance e Ives Durand balharàn lor espectacle de contes e de cants: Tè tu tè ieu! . Long d’una ora, los dos complices se panan la paraula a biti e a biò, a tu e a ieu, en francés e en occitan, dins una creacion originala que torna vistalhar los contes e los cants populars lengadocians, amb los ajustes pertinents dels dos companhs. Se tornarà trapar amb fòrça plaser los dos artistas descobèrts e estimats dins d’espectacles diferents dins las edicions passadas de Fasètz la Lenga. A 20h30, seguirà (Sala de la Tor) una taulejada conviviala, organizada en ligason amb las Ampelofoliás de Cabardés. A l’entorn d’un gostós plat occitan, se tastaràn los vins de Tursan, convidats de l’edicion 2016.
 
Las Ivernalas, costat practic
 
—  dimars 19: intrada liura; participacion a las despensas del sopar (7 €)
—  dimècres 20: participacion liura
—  dissabte 23: espectacle de 5 €; sopar de 15 € (amb reservacion: 04 68 25 19 78 o ieo11@ieo-oc.org); tarifa especiala e espectacle amb sopar per 18 €.
 
Las Ivernalas de Cabardés son une iniciativa de l’Institut d’Estudis Occitans d’Aude e del Servici Cultural de Puègnautièr. An lo sosten del conselh departamental d’Aude e comptan amb la participacion e l’ajuda de las Ampelofoliás de Cabardés, la Calandreta de Carcassona, lo Cercle Occitan del País de Carcassona e Fasètz la Lenga en Cabardés.
 
 
Las Ampelofoliás de mai en mai bèlas
 
Fèsta dels vins de Cabardés e de la rabassa negra, las Ampelofoliás de Cabardés se debanan pendent tres jornadas del divendres 22 al dimenge 24. Se dobriràn a Montoliu lo divendres (18h30) amb de lecturas sul tèma del vin que faràn omenatge a l’escrivan Joan-Glaudi Pirotte, mòrt en 2014 e qu’animèt lo Vilatge del Libre fa qualques annadas.
 
Pel dissabte 23, es ja tròp tard per ongan per se marcar al talhièr-cosina de la rabassa animat per Mirèlha Braç e vos avèm presentat çai sus la serada amb espectacle e repais en ligason amb las Ivernalas.
 
Puèi, dimenge 24, es lo jorn bèl a Mossolens (de 9h30 a 17h): grand mercat del terrador (taulièr de l’IEO Aude, ont Mirèlha Braç signarà Afogassets e trufariás), concors de recèptas rabassadas, concors de poda, jòcs e animacions pels enfants, vesita de la glèisa, musicas (amb Tarabastar per faire ausir las sonoritats occitanas), entrepans rabassats, vesita del Conservatòri Rabassicòla, demostracion de cèrca de rabassas, tasta de vins (Cabardés, Tursan) e, a doas oras e mièja del vèspre, un còp de fusilh anonciarà la dobertura del mercat de las rabassas negras!
 
 
Vendrà lo temps de Fasètz la lenga en Cabardés
 
La quinzenada d’animacion Fasètz la Lenga en Cabardés (portada per l’associacion del meteis nom) se debanarà al mes de març (del 7 al 19) amb un programa eclectic, repartit sus las comunas d’Argon, Mossolens, Puègnautièr, Ventenac e Vilagalhenc: grop vocal Cossí que Siague e Bigòt cantat per Francis Gaite (Puègnautièr, diluns 7); contes amb Danièla Julien (Mossolens, dimècres 9); pèça Monument a las Vidas (Puègnautièr, divendres 11); Aqueles (Vilagalhenc, dissabte 12); talhièr-cosina e passejada (Mossolens, dimenge 14); taulejada e balèti amb Fresquèl (Argon, dimars 15); serada amb Isabèla François (Argon, dijòus 17); concèrt del Còr de la Plana (Ventenac, dissabte 19); mòstra Lengas de guèrra; animacions dins las escòlas... Mas tornarem suls detalhs del programa quand lo temps vendrà...
 
 
 
 
IEO Aude






Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article