La polícia a detengut aqueste dimenge passat a Niça un gojat de 13 ans, suspècte d’èsser l’autor dels tirs de plomb que feriguèron doas dròllas de 4 e 5 ans. Los faches se passèron divendres passat dins l’escòla mairala Ariane-Muriers, que compta 115 escolans e que se tròba en un quartièr de Niça dich “sensible”. Se tirèt un dotzenat de tirs e los professors metèron sul pic los enfants en seguretat en esperant la polícia.
 
Lo jove detengut demòra dins la vesinança de l’escòla e “l’enquèsta contunha per determinar s’eu es ben l’autor dei tirs e, tombant lo cas, cen que son li sieus motivacions”, çò declarèt a l’AFP Marcel Authier, director departamental de la seguretat publica. Authier apondèt que la polícia a trobat un pistolet de plomb en cò del jove detengut.
 
Mentretant, an creat un dispositiu de seguretat a l’entorn de l’escòla, tant que durarà l’enquèsta, e una cellula d’ajuda psicologica es installada. Lo rector rescontra uèi las familhas.
 
Ne podètz legir mai d’informacions sus Nice Matin.
 
 
 
 
 
 
 
 

---