Bandièra01 1180x150: Comuna de Tolosa

Actualitats

Rescòntre: un festenau vidèo amator occitan qu’a ben capitat!

Donar una plaça legitima a l’occitan dins la vida vidanta es la tòca dei partenaris dau festenau

Rescòntre o lo 6n Festenau de Vidèo Amator de Sant Gervasi (Costiera de Nimes), lei 6 e 7 de febrier de 2016, èra organizat per l’associacion Raions d’Òc e sei partenaris: Te Ve Òc, Tèle Mistral, Ràdio Lenga d’Òc, lo CIRDÒC, V2C  e TV Sud. Un public nombrós poguèt entendre la lenga occitana dins sei varietats a travèrs dei 21 cortmetratges mandats per d’amators de vidèo afogats.
 
Lei tèmas dei filmes: de documentaris, de ficcion, de clips e de reportatges èran causits en Occitènia, amb de comentaris en occitan o en francés.
 
Donar una plaça legitima a l’occitan dins la vida vidanta es la tòca dei partenaris dau festenau.
 
 
Dissabte, un programa variat
 
En 2016, se presentèt de cortmetratges sus lei musicas occitanas actualas, la transmission de la lenga e la cultura d’òc, lo patrimòni, lei manifestacions occitanas, lo collectatge, lei tradicions, l’economia locala o la fauna. Un omenatge de tria foguèt rendut, amb un filme de France 3, a Joan-Pèire Belmon, jornalista e productor artistic, tròp lèu desaparegut (realizaire: E. Ertostene; productor: AMDA d’Avinhon; autorizacion: G. Blanc).
 
Se projectèt de creacions de collegians amb 4 filmes realizats dins l’encastre dau projècte academic occitan Zo petaçon de 2015. A Brinhon e Sant Genieis de Malgoira (Gard) e a Maruèjols (Losera), causiguèron lei tèmas e bastiguèron sei dialògs en cors d’occitan amb sei professors: Claudina Paul e  Cristòl Causse. Foguèron filmats per Te Ve Òc que lei faguèt trabalhar sus la mesa en scèna, la paraula e lo rodatge.
 
De liceans de Banhòus d’una seccion de cinèma faguèron un filme amb l’ajuda de l’Uelh Escota (L’Œil Écoute). De jovei locutors d’occitan, aquò’s l’avenir!
 
 
Dimenge l’istòria locala
 
Miquèu Gravier, de Raions d’Òc, presentèt un lòngmetratge, Istòria de Sant Gervasi de 1815 a 1914, un trabalh requist de recèrcas e collectatge qu’agradèt fòrça.
 
Après una discussion animada amb Miquèu Gravier, la mòstra dau CIRDÒC, Lengas de guèrra, venguèt precisar qu’en 14-18, dins lei trencadas, lei lengas parladas èran ben, mai que mai, lei lengas regionalas, tan mespresadas a l’ora d’ara. 
 
 
Un moment de convivéncia
 
Un temps conviviau, amb un aperitiu ofèrt e un repais partejat, acabèt la serada dau dissabte, ben dins lo biais de viure occitan. Lo festenau de 2016 foguèt presat per totei!
 
Un reportatge realizat per Amada Cròs, emplegada de Te Ve Òc, serà lèu en linha sus http://teveoc.e-monsite.com/
 
 
 
 
La còla dau festenau RESCÒNTRE
 
 
 



 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma de Mallorca
2.

La lenga oc ha de conquistar los medias a base de producir força videos, films,radios,internet, tv ,com han pogut aconseguir los fraires berbers.

  • 2
  • 0
Thomas Guilhèm Tolosa
1.

Youtube ! Youtube ! O los crompar en linha endacòm !

  • 2
  • 0

Escriu un comentari sus aqueste article