Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaComtat VenaicinComtat Venaicin

La justícia a relaxat l’universitari provençal enseguit per citar ironicament de prepauses dobtoses de Manuel Valls

Es una victòria amb “amarum”, segon lo professor, qu’apond: “perque [la victòria] es sus ma pròpria universitat que s’èra portada partida civila còntra ieu”

| Révolution Permanente
La justícia a relaxat Bernard Mezzadri, l’universitari provençal enseguit per aver fach d’ironia contra lo primièr ministre francés, Manuel Valls. Mezzadri èra enseguit per “provocacion a l’òdi racial”, mas lo tribunal correccional d’Avinhon a rendut aquela decision. “Es una victòria, cèrtas, mai una victòria amb ben d’amarum perque [la victòria] es sus ma pròpria universitat que s’èra portada partida civila còntra ieu. O repetisse, ieu siáu pas racista”, çò declarèt Mezzadri a l’anóncia de sa relaxa, segon çò que rapòrta Le Dauphiné.
 
Antropològ e especialista de mitologia, aquel universitari originari de Chastèu Arnós, qu’es mèstre de conferéncias a l’universitat d’Avinhon, publiquèt en mai de 2015 un messatge sus una lista de discussion intèrna reservada als ensenhaires-cercaires e als personals de l’Universitat d’Avinhon, nomenada “debat-uapv”. En ocasion del rescontre d’una delegacion de l’universitat venaicina amb lo primièr ministre francés, Mezzadri remembrèt ironicament los prepauses dobtoses de Valls sul mercat d’Évry (Illa de França), que Valls n’èra alavetz lo primièr cònsol. L’escrich de Mezzadri disiá: “Espère qu’en aquela granda ocasion, la delegacion de l’Universitat d’Avinhon e dau País de Vauclusa comptarà pron de «blancos» (e pas tròp de morets), per donar pas un imatge tròp marrit dau nòstre establiment.”
 
Puèi, lo qu’èra alavetz president de l’establiment universitari, Emmanuel Éthis, amb son servici juridic, “senhalèron” al procuraire de la republica aquela contribucion. E mai se l’intencion evidenta de Mezzadri èra de denonciar sarcasticament de prepauses dobtoses de Manuel Valls, la justícia acusava l’universitari provençal d’aver “provocat a la discriminacion, a l’òdi o a la violéncia a l’esgard d’una persona o d’un grop de personas en rason de lor origina de lor apertenéncia o de lor non-apertenéncia a una etnia, una nacion, una raça o una religion determinada”.
 
 
Una peticion de sosten en linha
 
D’universitaris de pertot avián lançat una peticion en linha per sosténer Mezzadri en demandant la relaxa pura e simpla del professor provençal. S’amassèt mai de 10 600 signaturas.





Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc Palma de Mallorca
2.

E jo que me pensava que aquestas causas solament passaven amb lo PP ? Ont és la libertat,la igualtat e la fraternitat.? Solament als libres.

  • 0
  • 0
SEMPERVIRENS
1.

aqest incident ei gostós, qu'ei la sèrp que se moarde la coa , l'inculpat èssent un gauchista (esquerrista) patentat. es urgènt d'abolir lei lèis liberticidas Gayssot e Taubirat, la primiera qe bloqueja tota recerca sus la segonda guèrra mondiala e la segonda que fai deis individùs de color blanca lei solets responsables de la traite dei negres, en oblidant lei musulmans e lei tribùs negras eli metei que capturavan de negres d'autras tribùs per lei vendre ai negriers. se siatz escalustrat per lo mot negre, pasmens corrènt en oc, remplaçatz lo per mot alemand "schwartz" que nos cambiarà agradivament de l'anglés black e tanben farà un liame entre lei doas lèis a suprimir d'urgència

  • 2
  • 15

Escriu un comentari sus aqueste article