Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaComengeComenge Baish

Escòla: viatge occitanolatin en Catalonha

Deth 16 ath 19 de heurèr, 30 escolans de 4u deth Collègi Emile-Paul Vayssié d’Aurinhac (Comenge), acompanhats peths sòns professors d’occitan, de latin e de sciéncias dera vita e dera tèrra, que participèren a un viatge pedagogic en Catalonha.
 
Aqueth viatge que s’inscriu en un projècte interdisciplinari, aperat Percors Romanic. Despuish eth mes de seteme, eths escolans de 4u qu’an causit d’estudiar eth occitan o eth latin qu’an trebalhat sus eth eretatge culturau deth Empèri Roman e sus eras parentats entram eras diferentas lengas romanicas. S’eth accent é estat botat sus eths vesiatges entre occitan e catalan, duas lengas bessoas d’un punt de vista geografic e lingüistic, eras autras lengas latinas —portugués, castelhan, italian, romanés, francés…— son cap estadas desbrembadas. Pendent aqueth viatge, eths escolans que poderen donc botar en practica eras suas coneishenças e familiarizà’s in situ dab era cultura catalana, sustot qu’èran aubergats en familhas catalanofònas. Que poderen tanben practicar eth occitan uns quantis còps, per exemple quan huren entrevistats per un jornalista de Barcelona Televisió e quan arrepeteren era pèça de teatre que jogaràn ath primtemps.
 
S’aqueth viatge arresponiá nà un objectiu lingüistic, qu’aviá tanben coma finalitat de hèr véder eras estretas arrelacions qu’unishián —e qu’unishen tostemps— eras tèrras occitanas e catalanas. Eths escolans qu’an atau podut comprénguer qu’abans d’èster ua termièra eths Pirenèus que son un lòc d’escambis e de passatges. Pendent aqueris 4 diás, un tepèr de visitas qu’èran programadas: a Barcelona —eth Musèu d’Istòria de Catalonha, eth centre istoric, eth Park Güell, era Sagrada Família, eth Musèu dera Sciéncia— mès tanben a Tarragona —eth anfiteatre e eth circ arromans, era catedrala— sense desbrembar eth Musèu deth Exili dera Jonquera, consacrat ath exòde deths republicans espanhòus ara fin dera guèrra d’Espanha. 
 
Enfin, que cau senhalar eth bon comportament deths escolans tot eth long deth viatge. Ara rentrada, que les calerà aprestar diaporamas sus diferentis tèmas: era Catalonha romanica, eths simbòls dera identitat catalana, eras arrelacions occitanocatalanas despuish eth Atge Mejan, eth modernisme, era guèrra civila e eras suas consequéncias. Aqueris trebalhs que seràn presentats aths parents ara fin dera annada.
 
 
 
 
Joan Pau Ferrè


Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article