Bandièra01 1180x150: Comuna de Tolosa

Actualitats

La justícia francesa a validat l’expulsion dels migrants d’una partida de “la Jungla” de Calais

Las organizacions umanitàrias critican la mesura bòrd qu’es “una violacion dels dreches fondamentals dels migrants”

| The Conversation
Lo tribunal administratiu de Lilla refusèt, ièr dijòus, lo recors presentat per divèrsas associacions pròdreches umans e validèt l’evacuacion dels campaments de refugiats de Calais. Segon lo govèrn francés, la mesura tòca 1000 personas, del temps que las organizacions umanitàrias denóncian que s’expulsarà almens 3700 personas.
 
Dins aquel sit, conegut coma “la Jungle” (la Jungla), ara i subrevivon dins de condicions desesperantas qualques milièrs de personas qu’ensajan a d’escasenças repetidas d’aténher lo sòl britanic en sautant dins los camions, en s’amagant dins los trens o en caminant a travèrs de l’Eurotunnel. Fugisson la guèrra e la pauretat
 
Lo govèrn francés vòl reduire a 2000 personas la populacion del campament, principal problèma en matèria de migracion de França. “Cal una responsa umanitària”, çò diguèt dimars passat Manuel Valls a RTL. Lo primièr ministre francés precisava: “sèm a evacuar amb metòde, amb lo temps necessari aqueles campaments pr’amor que podèm pas acceptar las condicions terriblas que i vivon aqueles migrants, que son indignas; podèm pas acceptar de far en sòrta qu’un bidonvila contunhe de se dreiçar aital a las pòrtas de Calais”.
 
La prefectura cèrca de transportar entre 800 e 1000 migrants vèrs de centres d’albergament dins divèrsas vilas de l’estat francés. Mas, segon las associacions, la partida sud del campament que se vòl desmantelar aculhís plan mai de mond que los que lo govèrn francés compta. Segon l’ONG britanica Help Refugees, la mesura tòca 3450 peronas dont 300 menors tots sols, e la majoritat refusan de partir.
 
“Es una violacion dels dreches fondamentals dels migrants. Las solucions prepausadas son absoludament pas adaptadas a lors besonhs. Devon poder demorar aicí fins que se tròbe d’autras solucions”, çò dison las associacions que sostenon e ajudan los migrants de la Jungla de Calais.
 
 
 


De legir: “Mas, de bon, es aquò Euròpa?”: las condicions desesperantas dels migrants a Calais

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article