Bandièra01 1180x150: Comuna de Tolosa

Actualitats

Rugbi de XIII: lo Dragon dobrís un uèlh

Pels U19 Catalans, lo dobertura Lucas Albèrt, felicitat per sos companhs, marquèt 21 punts: dos ensages, cinc transformacions, una penalitat e un tombat
Pels U19 Catalans, lo dobertura Lucas Albèrt, felicitat per sos companhs, marquèt 21 punts: dos ensages, cinc transformacions, una penalitat e un tombat | Dragons Catalans

Amb lo mes de març qu’arriba, l’actualitat tretzista s’intensifica: represa del campionat australian, debuta del Tolosa Olimpic en League One, segonda fasa del campionat...


L’esvelh dels Dragonss
 
Los Dragons se devián faire perdonar la partida pietadosa perduda a domicili fa una quinzenada, 38-10 fàcia a Hull-FC. E aqueste dissabte recebiá lo campion 2015 de Super-Liga: Leeds. Se vegèt de jogaires mai motivats que fa una quinzenada, lo novèl vengut Willy Mason pesèt de tot son pes sul jòc e la palma circulèt d’un melhor biais pel plaser dels 8 000 espectators presents. Tre la quatrena minuta, lo segonda linha Dave Taylor marca e Richards transforma, mas Gigot pataqueja la recepcion d’una palma qu’un Rinoceròs transforma en ensag. Lo mesclanha Miller a la recepcion d’un recentratge de l’alièr Broughton torna balhar l’avantatge als sang e aur qu’encaissan una penalitat sus la còrna: 12-8 a la pausa.
 
Los catalans tornan amb de cambas de fuòc: Krisnan Inu trauca sus 40 mètres, doas grimaças e dos cambiaments de pè mai luènh, es darrièr la linha. Tony Gigot surgís a l’interior de sos avants e punta entre los pals: los catalans menan 24-8 e vendémian una ocasion supèrba de faire un trauc definitiu. Lo Rinoceròs reguitna e, sus doas relanças, marca per tornar a 24-20. En fòrça, Dave Taylor torna balhar un avantatge de dètz punts als Dragons. Jos una pluèja anglesa, Handley trauca la defensa catalana, Richards ajusta una penalitat e lo darrièr ensag de Watkins pòt pas manlevar la victòria als Catalans: 32-28. Lo campion se trapa darrièr amb tres desfaitas en tres partidas!
 
Tres esquipas an ganhat las 3 primièras partidas: Widnes se trapa cap de fila aprèp sa victòria a Huddersfield 36-18. L’acompanhan Warrington que bat Wakefield 34-16 e Wigan que se deu emplegar per batre Salfòrd: 20-16. Hull-FC se fa susprene per Castlefòrd 31-24 e Hull-KR pèrd fàcia a Sant-Helens: 31-22.
 
Dimenge, los Dragons seràn en Anglatèrra per afrontar los Gats-Fèrs de Wakefield. Se demòran sul vam de dissabte, poirián ganhar al defòra: çò que saupèron pas faire la sason passada.
 
Autra bona novèla pels Dragons: la victòria, en partida de dobertura, de sos U19 fàcia a Leeds per lor primièra partida oficiala dins lo campionat anglés: 37-30. De sotalinhar los 21 punts: dos ensages, cinc transformacions, una penalitat e un tombat del dobertura Lucas Albart.
 

Tolosa, salsa anglesa
 
De son costat, lo Tolosa Olimpic a fait coneissença amb las realitats del XIII anglés en anent ganhar en Copa d’Anglatèrra, en riba de mar d’Irlanda, cò dels nharruts Wath Broth Horners 32-14. Una bona mesa en camba abans la primièra partida de League One aqueste dissabte 5 de març a 3 e mièja del vèspre a Blanhac amb la recepcion dels Orses de Coventry.

 
Represa en Australia
 
Aquesta debuta de març vei la represa del campionat NRL en Australia amb la partida aqueste dijòus entre las Anguilas de Parramatta e los Cavals-Fòls de Brisbane. Se sap la dificultat granda dels campions de servar lor trofèu d’una annada a l’autra. Vaquí doncas l’escomesa pels Vaquièrs del Joanathan Thurston que recebràn las Làmias de Cronulla http://www.sharks.com.au dissabte. Vos rapelam que doas o tres partidas se pòdon seguir cada setmana sus BeInSport, coma las de Super-Liga.

 
Limós fa fecòs al Molin
 
Al país, èra la debuta de la segonda fasa del campionat. La pluèja empachèt lo debanament del rescontre Palau-Tolosa. En pola 2, Avinhon l’emportèt dissabte sus Albi: 36-22. Dins la pola bèla, al Molin, Lesinhan e Limós se liurèron una batèsta dedicada a l’ofensiva. Cada formacion aguèt son temps de dominacion, mas lo final virèt en favor dels vesitaires. Sus un ensag marcat dins las darrièras segondas, Murcià ajustèt la transformacion del recanton que manlèva lo punt del bonus defensiu a Lesinhan: 44-30.
Son al programa de la dimenjada venenta: lo revenge del quart de Copa AS Carcassona-Lesinhan (pola 1; dimenge a 4 oras del vèspre), Albi-Dragonets (pola 2; dissabte a 7 oras de la nuèit) e Vilanòva-Palau (pola 3; dimenge a 3 oras del vèspre).
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article