Bandièra01 1180x150: Comuna de Tolosa

Actualitats

L’Aia condemna Jean-Pierre Bemba

An qualificat los viòls, torturas e assassinats que faguèt son armada, de crimes de guèrra contra l’umanitat

La Cort Penala Internacionala de l’Aia a condemnat lo criminal de guèrra Jean-Pierre Bemba per sa responsabilitat coma cap d’una armada qu'organizèt una campanha de viòls, torturas e assassinats en Republica Centreafricana en 2002 e 2003. Las accions d’aquela armada las an qualificadas de crimes de guèrra contra l’umanitat.
 
Aital es lo primièr còp qu’una cort internacionala condemna lo cap d’una armada per las accions d’aquesta coma son cap. La senténcia es una responsa de la justícia a las demandas de divèrses grops feministas e prò-dreches umans qu’avián sollicitat de considerar los viòls massisses tanben coma una arma de guèrra e non pas solament un produch d’aquesta.
 
La cort èra formada per de jutgessas, per tant totas de femnas, qu’an volgut aital punir Jean-Pierre Bemba pr’amor qu’el sabiá çò que fasiá la siá armada e faguèt pas res per o evitar. En mai d’aquò, la cort a reconegut que los viòls massisses foguèron comeses contra de femnas e tanben de filhas de dètz ans e se faguèron en preséncia d’enfants d’autres parents.
 
Dempuèi que perdèt lo poder coma vicepresident de la Republica Centreafricana, Jean-Pierre Bemba, un milionari fòrça important dins son país, partiguèt en Còngo en 2006. Alavetz e davant la manca de poder oferir de proteccion als testimònis, aquel país demandèt justícia a la Cort Penala Internacionala de L’Aia. Bemba foguèt detengut en 2008 pendent una vesita en Belgica. En aquela ocasion, los abitants de Còngo s’estonèron plan pr’amor que totes pensavan qu’èra una persona intocabla.
 
 
 
 
Christian Andreu

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article