Bandièra01 1180x150: Comuna de Tolosa

Actualitats

China legaliza 13 milions de ciutadans sens dreches

A causa de la politica de l’enfant unic, l’1% de la populacion chinesa son de personas illegalas

| Mike Beltzner
Après arrestar definitivament la lei qu’enebissiá d’aver mai d’un enfant, lo grand gigant asiatic a rescontrat divèrsas consequéncias non volgudas. Una d’elas es qu’aviá de legalizar de milions de personas que demòran en China sens aver de dreches coma chineses. E los a legalizats ongan.
 
Aquò s’es passat pr’amor que la lei chinesa a pas permés pendent mai de cinquanta ans d’aver mai d’un enfant, mas i a agut de mond que n’an agut mai d’un. Eles deguèron pagar una multa a l’estat e l’enfant èra privat del ciutadanatge chinés. Dins aquela situacion se tròba en China tretze milions de personas, qu’amb lo cambiament pòdon demandar de venir de ciutadans legals.
 
Aquelas personas poiràn tre ara aver drech a de servicis basics coma l’educacion, la santat o l’abitatge, gràcias a la reforma del registre civil nomenat hukou, que China a començat d’aplicar ongan. Amb ela, a tanben entamenadas divèrsas reformas administrativas mas i aviá fòrça mond qu’esperavan amb jòia la reforma del hukou.
 
 
L’inexisténcia sociala dels enfants negres
 
Aital, los mai de 13 milions d'enfants negres —ansin  los nomenan— an pas agut dempuèi l’an 1978 fins ara cap de visibilitat sociala. L’hukou es un certificat de naissença que balha de dreches civils que los enfants negres non los an pogut aver jamai.
 
Podián pas anar a l’escòla o dins los espitals, ni mai accedir als lotjaments socials ni manco pas èsser foncionaris publics. En definitiva, existissián pas. D’aqueles 13 milions —l’1% de la populacion chinesa— lo 60% son d’enfants negres, e los autres d’orfanèls o d'enfants de maires celibatàrias —en China solament pòdon aver d’enfants las personas maridadas—.
 
Aquel sistèma legislatiu foguèt adoptat per arrestar las migracions massissas del mond que volián anar demorar dins las vilas. E es vengut una vertadièra forma de contraròtle social pr’amor que sens l'hukou los chineses non pòdon pas cambiar d’adreiça, trobar un emplec ni mai viatjar.
 
Ongan se sap que ja i a mai de 200 milions de chineses qu’an migrat dins las vilas illegalament, sens dreches. La politica de l’enfant unic e los chineses illegals avián pas mai cap de sens: per tant lo govèrn l’a reformada. Èra ora.
 
 
 
 
Christian Andreu

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Donat lo grammatician
1.

13 milions d'enfants negres, 200 milions de chinés sens drechs, lei chifras te balhan lei lordums. Ai legit pereu quauqua part que li auriá au mens 100 milions de mascles de tròp que amb la lèi. podiás avortar ad libitum e que lei filhas èran primieras sacrificadas. moralitat n'i a ges o puslèu una ;laissètz faire la natura, natura naturans disián lei teologians

  • 3
  • 0

Escriu un comentari sus aqueste article