Bandièra01 1180x150: Comuna de Tolosa

Actualitats

Rugbi de XIII: e de quatre pels Dragons!

Una pauma ovala e se jòga a XIII (a tocar) sus una pelena d’Amsterdam...
Una pauma ovala e se jòga a XIII (a tocar) sus una pelena d’Amsterdam... | Mirèlha Braç
Òm pòt pas escapar a sa destinada. En viatge toristic del costat d’Amsterdam, vaquí que sus la pelena de la plaça dels musèus, un grop de gojats, aprèp unes exercicis fisics, prenon una palma ovala e se meton a jogar a 13 a tocar!!! Coma qué, la civilizacion est totjorn en marcha e perseguís son camin!!!
 
 
Los Dragons se sasisson del drakar viking!
 
Son los trabalhs forçats en Superliga e aquò fa pas plaser als entraïnaires: quatre partidas en quinze jorns menan a un quarantenat de jogaires nafrats.
Atal, dissabte a Brutus, los Dragons podián pas comptar amb lo menaire de jòc Carney fàcia als Vikings de Widnes.
 
Dins lo primièr temps, sol un ensag de Pat Richards balhèt d’òbras al prepausat al planchòt. A la represa, Duport puntava un ensag mas Widnes tornava a 8-8 amb un ensag de l’alièr Thompson transformant per Hanbury qu’ensacava tanben una penalitat.
 
Lo pilar sang e aur Dave Taylor fasiá parlar la fòrça per anar darrièr la rega, Richards transformava ; Tomàs Bòsc clacava lo tombat qu’assegurava la diferéncia e Pelissièr s’escapava darrièr lo tengut (transformacion: Richards). Los Dragons se ganhan atal la partida 21-8 , e se meton a l’auçada de Widnes al classament a 2 punts de Wigan e 4 del cap de fila Warrington qu’a ganhat 28-16 justament a Wigan. Los trabalhs forçats se perseguisson pels Dragons amb un desplaçament cò d’Hull KR tre aqueste dijòus.
 
 
Carcassona se fa plaser
 
Al tèrme d’una partida enlevada, dimenge, Carcassona batèt Limós 42-22. Los Canaris prenon la primièra plaça al classament de la pola 1, mas Limós la deuriá tornar trapar logicament en batent dimenge qu’arriba Lesinhan que recebon a l’Agulha.
 
En pola 2, Albi resistís als Dragonets sus la pelena de Sant Estève: 30-24. Dissabte, Avinhon en desplaçament cò d’Albi voldrà reprene la primièra plaça del grop e s’assegurar lo quart a domicili.
 
En pola 3, Tolosa signa sa primièra victòria de la segonda fasa fàcia a Palau 32-30, mas serà la partida d’aqueste dimenge de vèspre, Vilanuèva-Tolosa, que designarà l’oiten qualificat per las fasas finalas.
 
 
Los Roosters sortisson pas de l’uòu
 
En NRL, los Polets-Roosters de Sydney encadenan una cinquena desfaita (sus lor pelena —encara mai!—: 28-32 fàcia als NZ-Warriors, e puntan a una posicion plan inabituala: darrièrs! Los Vaquièrs dominan los Dragons de Sant Jòrdi, 36-0, e los Lapinons ganhan a Manly 16-12 .
 



Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article