Bandièra01 1180x150: Comuna de Tolosa

Actualitats

Rugbi de XIII: la Copa serà occitana o catalana?

Un grand dissabte de 13 s’anóncia per aqueste dissabte 16 d’abril a Carcassona: torneges, rugbi de 7 e finalas de la Copa dels Juniors Lesinhan-Albi e Copa Lord-Derby entre Limós e Sant Estève XIII Catalan. Se venètz pas a Carcassona, poiretz seguir la partida sus França 3 Sud.
 
 
Los Dracs engàbian los rigals
 
Los Dracs perseguisson sus lor lançada e, dijòus de ser, son anats ganhar largament e amb la manièra cò d’Hull KR: 40-0. Passan segonds vist que Wigan a encaissat un espantant 62-0 a Wakefield e se rapròchan de Warrington batut per St Helens: 25-22. E tre dijòus, los Dracs van a… St Helens.
 
 
Lo campionat n’acaba amb la segonda fasa
 
Limós aviá lo cap a la finala de la Copa e daissa filar lo dèrbi contra Lesinhan amb una parodia tristoneta: presentacion d’un grop de reservistas e de juniors. Victòria del pòble de Corbièras: 78-10. Avèm pas lo còr de faire de comentaris.
 
En pola 2, Avinhon ganha a Albi 29-20 e jogarà son quart a domicili. Vilanuèva pren la darrièra plaça de barratgista en batent los joves Tolzans (59-6) que n’acaban amb una sason malaisida.
 
Dins una quinzenada, los barratges se jogaràn en Catalonha Nòrd amb las partidas Dragonets-Vilanuèva e Palau-Albi.
 
 
Tolosa en Cup
 
Tolosa, qu’es anada batre 68-0 los Escorpions galeses, recebrà aqueste dissabte en fin de vèspre a Blanhac l’esquipa de Championship de Leigh pel compte dels setzens de la Cup.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article