Bandièra01 1180x150: Comuna de Tolosa

Actualitats

Lo Parlament de Catalonha e Aran a forçat l’aplicacion de la lei de l’occitan

Una mocion presentada pels socialistas es aprovada amb tres còps mai d’engatjaments

Lo Parlament de Catalonha a forçat l’aplicacion de la lei de l’occitan en tot ne refortir qualques aspèctes. Se debatèt ièr, dins la comission de la cultura (vidèos), una mocion presentada pel grop socialista (PSC) per forçar lo desplegament de qualques aspèctes d’aquela lei. Puèi, gràcias als emendaments dels grops de Junts pel Si, e sustot de la CUP, aquela mocion a multiplicat per tres los engatjaments en favor de l’occitan. Partit Popular refusèt la mocion e critiquèt las politicas en favor de l’occitan.
 
Del temps que presentava la mocion, lo representant socialista planguèt que “la sola causa que foguèt menada a bon tèrme [foguèsse] la mesa en marcha de l’Institut d’Estudis Araneses coma Acadèmia Aranesa de la Lenga Occitana”, una acadèmia que critican per son implantacion “sens consens social ni scientific”. Lo PSC demandèt a la cambra de tornar sus las reduccions budgetàrias tocant l’occitan, de recuperar lo budget de 2010 e que tornèsse valorizar l’occitan per la polícia autonomica, los Mòssis d’Esquadra.
 
Òr, las contribucions de la CUP e Junts pel Sí an agut per resultat una mocion que tanben inclutz la valoracion de l’occitan per totes los foncionaris, e pas solament los policièrs, per que la lenga nòstra siá presenta e disponibla dins totes los departaments de la Generalitat de Catalonha e que siá mai presenta dins los mèdias.
 
 
Se refusa l’occitan coma lenga preferenciala de las comunas d’Aran
 
Dins la presentacion dels emendaments, la deputada aranesa Mireia Boya (CUP) planguèt que s’utilizèsse d’argent destinat a l’occitan per finançar de publicacions en espanhòl en Aran. En mai d’aquò, critiquèt que los conselhs municipals d’Aran priorizèsson lo castelhan coma lenga de la comunicacion, de las afichas de las fèstas, de las publicacions, etc.
 
Per tant, sas proposicions inclusián dos emendaments per que l’occitan foguèsse lenga preferenciala dels conselhs municipals d’Aran e tanben dins las comunas de Catalonha amb populacion d’origina aranesa. Lo PSC refusèt aqueles emendaments, en demandant instantament a Boya de presentar una autra mocion. En mai d’aquò, lo PSC refusèt tanben la proposicion de Junts pel Sí, de demandar als conselhs municipals d’Aran qu’apliquen las previsions de l’usatge preferencial de l’occitan segon la Lei de l’occitan e la Lei d’Aran.
 
 
L’occitan es colpable de bas rendament escolar segon lo PP
 
Las intervencions de Ciutadans e del Partit Popular foguèron fòrça occitanofòbas. Ciutadans defendèt qu’en Aran i a tres lengas, e que ne cal pas metre una subre las autras, del temps que lo Partit Popular afortiguèt que l’ensenhament en occitan es lo colpable que los resultats escolars en Aran sián los piègers del Principat de Catalonha e Aran.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Emmanuèl Isopet
5.

Soi ben un pauc del costat de la deputada aranesa e d'Òlo. Puslèu que d'aver una « lei per l'occitan » qu'impausa l'occitan pertot en Catalonha (çò que me sembla fòrça estranh), perque pas impausar l'occitan coma sola lenga de la Val d'Aran (ont lo catalan a pas mai sa plaça que l'occitan dins lo demai de la Generalitat). Atal los mejans per formar de locutors dins la Generalitat podrián èsser emplegat a la difusion de l'usatge de l'aranés en Val d'Aran (contra lo castelhan e lo catalan) ; me sembla que seriá mai « logic », mas soi ni aranés ni especialista de l'afar.

  • 0
  • 0
Pirolet
4.

#3 Urosament que n'i a que son aquí per nos far rire!

  • 1
  • 0
Fontalive Sant-Marti-Vau-Marouno
3.

So que se pot dire es que l'aranés o pas ris à vèire ammé nousto lengo d'oc e qu'es un parla catalô. Alèro vézi pas perqué nous chautan talomen d'aquelo valado.
Nous entenden mièl en parlant francés al supermerchat qu'en parlant en oc d'un coustat, en aranés de l'aute.

  • 0
  • 8
Gerard Joan Barceló Pèiralata
2.

E coma votèron lei deputats de CSQP?

  • 5
  • 0
Òlo Pujòlo
1.

Se non ac enteni mau, eth PSC a instàncies d'Unitat d'Aran, exigís ath Parlament que s'aplique era Lei der aranés. E quan eth Parlament ditz que òc, alavetz eth PSC arrefuse que sigue lengua preferenciau enes ajuntaments aranesi... Ja m'estranhaue a jo qu'aqueri qu'ac hèn tot en castelhan en Aran, e qu'en Lhèida govèrnen damb Ciudadanos, se preocupen pera nòsta lengua. Quina ipocresia

  • 17
  • 0

Escriu un comentari sus aqueste article