Bandièra01 1180x150: Comuna de Tolosa

Actualitats

Bessilhas aculhirà dijòus lo vinten recampament dels calandrons lengadocians

Pendent aquela jornada, los calandrons escambiaràn en occitan a prepaus de “l’istòria e lo temps de l’imaginari”, a l’entorn de jòcs, de talhièrs e d’espectacles

A l’entorn del tèma “L’istòria e lo temps de l’imaginari”, se recamparàn dijòus que ven, 9 de junh, a Bessilhas (País de Tau) los escolans de las escòlas Calandreta de Lengadòc. S’agís d’una jornada d’escòla en defòra de la classa e es lo ponch d’òrgue d’un trabalh pedagogic menat long de l’annada entre las Calandretas.
 
Pendent aquela jornada, los calandrons escambiaràn en occitan sus aquel subjècte a l’entorn de jòcs, de talhièrs e d’espectacles creats e jogats pels escolans de la Calandreta La Garriga (Ginhac) e de la Calandreta Dagtenca (Agde).
 
 
D’escòlas associativas en occitan
 
Las escòlas Calandretas, escampilhadas per tota Occitània, son d’escòlas laïcas e associativas qu’an un contracte amb l’estat, qu’emplegan la lenga occitana coma lenga veïculara sul programa educatiu fixat pel Ministèri de l’Educacion de França. La relacion entre los professors e las familhas es fòrça estrecha e los parents se pòdon engatjar dins lo projècte fins ont vòlon. A mai, cada Calandreta a una estrecha relacion amb son entorn immediat, e aital la coneissença de la realitat pròcha e l’engatjament dels escolans amb l’entorn son plan elevats.
 
A l’ora d’ara, Occitània compren 62 escòlas primàrias Calandretas mai 3 collègis Calandretas a Pau, Tolosa e Montpelhièr. Lengadòc compta amb 25 d’aqueles establiments, dont un collègi, qu’escolarizan, ara, 1902 calandrons de la Pichòta Seccion fins a la tresena.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article