Bandièra01 1180x150: Comuna de Tolosa

Actualitats

Rugbi de XIII: los Dragons pòdon pensar a la segonda fasa

Las emocions fòrtas son pas çò que manca quand se seguisson de partidas de rugbi de XIII; e pels occitans e pels catalans las causas se passan plan per ara

Los Blaus passaràn pas: Queenslnad ganha lo primièr Estats d’Origina de l’an.
Los Blaus passaràn pas: Queenslnad ganha lo primièr Estats d’Origina de l’an.
Los Dragons mestrejan lo Rinocèros
 
Divendres de ser, sus la fuèlha de partida dels Dragons a Leeds, dotze jogaires occitans e catalans en seguida d’una tièra de nafraduras. E l’espròva se revelèt positiva. Dins lo primièr temps, los catalans marquèron tres còps per Horo, Yaha e Baitieri. Amb doas transformacions de Carney, la marca èra de 16-6. Dins lo segond temps, Carney passèt una penalitat mas los angleses tornèron a 18-12 a l’ora de jòc. Una intercepcion de Pelissièr en fin de partida confirmava la victòria catalana: 24-12. Matematicament, los Dragons son ja assegurats de prene part a la segonda fasa de Superliga e fan partida dels quatre de cap que se destacan dins la competicion: Hull FC domina Widnes 30-10; Wigan ganha just a Salford 23-20; Warrington va ganhar a St Helens 26-4. Dins las autras partidas de la dimenjada: Hull KR es sens pietat per Wakefield, 54-16; e Castleford ganha a Huddersfield 30-22.
 
Aqueste dissabte, los sang e aur recebràn St Helens http://www.saintsrlfc.com a Brutus: l’escasença de daissar los Sants 8 punts enrèire e, coma los punts de la primièra fasa son servats per la segonda... De notar, l’afrontament bèl de divendres de ser entre Hull FC e Warrington (de seguir sus Be In Sport).
 
 
Tolosa cap de fila
 
Mercé a la victòria aquerida dissabte a Blanhac sus Doncaster 46-26, lo Tolosa Olimpic punta ara en primièra posicion de la Liga Un (League One) e se ditz que la montada al segond nivèl (Championship) pòt venir realitat tre ongan. Aquesta dimenjada, la formacion occitana se desplaça a Newcastle.
 
 
Los Catalans campions en XIII cadieral
 
Dissabte, a Tuïr, se tenián las finalas del campionat de XIII cadieral: Vichèi ganha en Elèit 2 e, en Elèit 1, lo bloquièr es pels catalans aprèp una partida sarrada: 29-26 fàcia a Sant Jòri (Tolosa).
 
 
6-4 e es pas de tènis
 
A l’ANZ Stadium de Sydney, se teniá dimècres la primièra de las tres partidas Estats d’Origina de la sason. Davant mai de 80 000 espectators, lo jòc foguèt d’una granda intensitat e la marca demorèt estreita. A la pausa, Queensland aviá marcat un ensag e una penalitat e la Nòva Galas del Sud un ensag: 6-4. Se marquèt cap de punt dins lo segond temps! Lo revenge se debanarà a Brisbane lo dimècres 22 de junh. Òm ne sòmia ja!
 
 
Lo rendètz-vos de Montpelhièr
 
Es aqueste dissabte 11 de junh que se tendrà lo Congrès de la Federacion a Montpelhièr. Se sap ja que serà seguit de las eleccions al comitat director lo dissabte 2 de julh a Tolosa. Las discussions viran sus l’oposicion entre lo president sortent, Carlos Zalduendo, e lo carcassonés Marc Palanques que menarà la lista alternativa XIII Units.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article