Bandièra01 1180x150: Comuna de Tolosa

Actualitats

Rugbi de XIII: los Dragons sul camin de la beatificacion!

Los Dragons catalans en Superliga e los occitans del Tolosa Olimpic en Liga Una son bravament en forma e cal esperar que ne serà atal dusca a la fin de la sason

Foad Yaha escapa a la defensa dels Sants per marcar
Foad Yaha escapa a la defensa dels Sants per marcar | Dragons Catalans
Superliga: lo trauc es fait!
 
Aprèp la victòria d’Hull FC a Warrington 19-12 e lo retorn sul fil de Wigan sus Hull KR 20-18, los Dracs sabián qu’una victòria, dissabte de vèspre a Brutus, lor permetriá de s’installar a la segonda plaça al classament e de remandar l’adversari del jorn en 5a posicion e a 8 punts. Situacion interessanta en vista de la segonda fasa e, ja, dins la perspectiva de la participacion a las mièjas finalas!
 
Onze mila espectators, la mai fòrta afluéncia de l’an, s’èran ramosats dins l’encencha perpinhanesa per seguir l’afrontament entre catalans e Saint Helens; Richards passèt una penalitat, mas lo tresena linha advèrs McCarthy-Scarsbrook trapava lo trauc dins la defensa sang e aur. Caliá esperar un quart d’ora per veire los catalans reprene l’avantatge mercé a l’alièr Yaha, puèi Carney metiá sus orbita Lucàs Albèrt. La jornada èra dedicada a la catalanitat e se festejava una convencion entre lo club e la Bressola pels 40 ans de l’escòla catalana, mas es Calandreta qu’a fornit un jogaire als Dracs! Carney ajustava un tombat abans la còrna de la pausa: 13-6.
 
A la represa, lo mesclanha catalan dels Sants, Teo Fages, tornèt pas: tocat al genolh. Los catalans faguèron lo trauc per Jodie Broughton en cap de linha (52a). Puèi, Dave Taylor, amb 4 angleses sus l’esquina, trasmetiá la palma per un ensag de Morgan Escarré seissanta mètres mai luènh (55a). Broughton signava un novèl ensag a l’ora de jòc. Tomàs Bòsc desplaçava lo jòc sus l’ala al pè e Broughton rebatiá la palma per Gigòt que puntava lo seisen ensag catalan de la vesprada. Los angleses marquèron en tota fin de partida, mas los jòcs èran faits: 33-16 pels catalans.
 
Los autres resultats: dijòus, Widnes ganhèt a Castleford 38-28; divendres, Leeds ganhèt (enfin!) 8-0 contra Salford e, dimenge, Wakefield s’impausèt a Huddersfield 10-2.
 
Divendres en serada, es un desplaçament gaire aisit qu’espèra los sang e aur: partida cò dels Lops de Warrington.
 
 
Tolosa, cap de fila
 
En Liga Una, Tolosa s’impausèt aqueste dimenge a Newcastle: 32-22. Pren atal la primièra plaça al classament amb 10 partidas jogadas e 19 punts, davant Rochdale e York (17), Keighley e Doncaster (16). E es justament aquela formacion de Keighley que los tolzans recebràn dissabte a Blanhac (18h30).
 
 
Cartons australians
 
46-0: tala es la marca de la victòria de las Làmias suls Poletons (desplumats) de Sydney! Los Tigres se manjan los Lapinons en salpiquet: 30-14. Los Warriors neozelandeses fan plan mai: passan un 50-14 als Cavalièrs de Newcastle. Los planchòts australians ne veson córrer de chifras d’aquesta passa!
 
 
Dins l’espèra de las eleccions
 
Dissabte, se debanava lo Congrès de la Federacion a Montpelhièr. Se validèt un campionat d’Elèit 1 a 11 formacions amb las montadas de la Reula e Sant Gaudenç. Mas lo mes de junh va veire las doas listas en preséncia per la direccion de la Federacion (la del president sortent, Carlos Zalduendo, XIII en marcha; e la del Carcassonés Marc Palanques, XIII units) preparar activament las eleccions del dissabte 2 de julh.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma de Mallorca
1.

Una grandassa manifestacion lo diumenge a París per defensar los drets del trabalhadors, coma sempre la policia actuà brutalament.

  • 1
  • 1

Escriu un comentari sus aqueste article