Bandièra01 1180x150: Comuna de Tolosa

Actualitats

Sturgeon anóncia que lo parlament escocés poiriá blocar lo Brexit

Lo referendum del “Brexit” es pas inalienable e cal l’aprobacion del parlament britanic. Segon un sondatge, lo 59% dels escoceses votarián per l’independéncia

La primièra ministra escocesa, Nicola Sturgeon, suggeriguèt dimenge un veto de son país al “Brexit”. Dins una entrevista a la BBC, Sturgeon diguèt que se lo parlament d’Edimburg deu donar son consentiment a la sortida britanica de l’Union Europèa, o farà pas: “Se lo parlament escocés jutja aquel tèma segon çò qu'interèssa Escòcia, l’opcion de votar pas çò qu'es contra l’interès d’Escòcia, evidentament, deu èsser sus la taula”, çò diguèt la primièra ministra. Lo 62% dels escocesses votèron dijòus en favor de contunhar dins l'UE, e lo govèrn d’Sturgeon prepara una legislacion per convocar, se cal, un referendum d’independéncia.
 
Interrogada pel jornalista de la BBC se se pòt imaginar la furor que generariá en Anglatèrra un blocatge escocés del “Brexit”, Sturgeon diguèt de òc. “Mas seriá benlèu similara a la furor que fòrça gents senton en Escòcia a l’ora d’ara en vesent la possibilitat d'èsser expulsats de l'UE contra la lor volontat”, çò diguèt la primièra ministra escocesa. “Ieu ai pas creat aquela situacion, me cal ensajar d’i navigar de la melhora manièra”, çò apondèt Sturgeon, que remembrèt qu’ela deu defendre los interèsses de las gents que l’elegiguèron coma primièra ministra.
 
Lo referendum del “Brexit” es pas inalienable, mas segon la tradicion democratica britanica es fòrça complicat de refusar un mandat de las urnas coma lo de dijòus, e l’encara primièr ministre britanic, David Cameron, garantiguèt que, malgrat el, los britanics sortirián de l'UE. Mas aquela sortida requerís lo consentiment del parlament de Westminster, e i a cada còp mai d'expèrts que parlan tanben del besonh d’una aprobacion, tanben, del parlament d’Holyrood, a Edimborg.
 
“I deuriá aver un consentiment a la legislacion que levariá lo Reialme Unit de l'UE? Segon un ponch de vista logic, es malaisit de creire que non. Sospièchi que lo govèrn britanic assumiriá una vision desparièra, e nos caldriá veire ont s'acaba la negociacion”, çò expliquèt Sturgeon a la BBC.
 
La possibilitat d’un blocatge escocés del “Brexit” poiriá èsser una estrategia del parlament escocés per obténer l’autorizacion d'un segond referendum d’independéncia, mai que mai se lo primièr ministre britanic que vendrà, prò-Brexit, lo refusa. Un sondatge publicat dimenge indica que lo 59% dels escocesses votarián “òc” a l'independéncia.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma de Mallorca
4.

La dreta escosesa pensa que las retalhadas que los imposan des d'Alemanha ajudan a los ladres a far caissa.

  • 0
  • 0
Ròdrigo Bigòrra
3.

Adixatz , er'Escosa non entrara jamès tota sola en er'union europenca pormor eth governament Espanhòu qu'a dit uei oficialament que oposaré eth sué 'veto' a tota discution sus er'entrada der'escosa tota sola ! domatge .

  • 1
  • 0
N. Eynaud Lo Martegue
2.

Lo Parlament Escocés pòu pas blocar lo Brexit car leis afaires estrangiers e europèus dau Reiaume Unit son una competéncia exclusiva dau Parlament Britanic (Scotland Act, art. 5). L'objectiu de Sturgeon sembla puslèu de renfòrçar la legitimitat democratica que li dona lo refús escocés dau Brexit per obtenir un segond vòte sus l'independéncia.

  • 1
  • 0
LACHAUD
1.

Tot aquò fai ben rire. Los politiques euròpens son mas capables de se plumar. D'aquel temps avem pas besonh de parlar daus occitans perque l'euròpeen dau nòrd fai l'Europe a nòstra placça.

  • 1
  • 1

Escriu un comentari sus aqueste article