En aquesta debuta d’estiu, vaquí que se trapan en cèrca de vam los Dracs catalans qu’encaissan una tresena desfaita en seguida e la Federacion aprèp lo cambiament de direccion. Per contra, en Liga Una, lo Tolosa Olimpic ne refofa.

Wigan gasta la fèsta
 
Tot èra al bèl per festejar la preséncia dels Dracs dempuèi 10 ans en Superliga: lo temps, lo public (12 000 espectators, l’estadi comol), las animacions, la nuèit festejaira... mas sus la pelena, còp de freg pels Sang e Aur, malbiaissuts e sens inspiracion. Se faguèron chapar tot crus per Wigan: 26-6.
 
Demòran en 4a posicion al classament amb 26 punts e daissan escapar lor adversari del jorn (30 punts) que rejonh Hull FC batut a Huddersfield 22-12 al tèrme d’una tièra de dètz partidas sens desfaita. Son a un punt de Warrington que va quèrre l’egalitat 116-16 cò d’Hull KR.
 
Mas los catalans son forçats de gaitar enrèire: St Helens, venceire 44-32 a Wakefield, es 5n a 4 punts. Cal arrestar l’espirala negativa del costat de Perpinhan e se sap l’importància bèla de la diferéncia entre una 4a e una 5a plaça: dins la segonda fasa, lo 4n se desplaça 3 còps e recep 4 còps; es l’invèrs pel 5n.
 
Mèfi doncas de pas tombar dimenge de vèspre e entre las arpas dels Tigres de Castleford.
 
 
Tempèsta sus Brisbane
 
Los Broncos de Brisbane se faguèron mai cavalons que cavals fòls fàcia a la Tempèsta de Melbournw qu’o ganhèt tot sus son passatge: 48-6! Novèlas desfaitas pels Poletons facia als Dògols (24-20) e pels Lapinons contra los Vaquièrs (20-0) . Los NZ Warriors son encara en corsa per intrar dins los uèit qualificats: victòria suls Titans, 27-8. Caps de fila al classament, las Làmias engolisson las Anguilas de Paramatta: 34-24.
 
 
Tolosa sens pietat
 
Los tolzans an mes una oreta a prene lo pas sus York, mas finiguèron per manjar l’entrepan al cambajon, 44-6, per confirmar lor primièra plaça. Dissabte, anaràn desfisar los London Skolars per la darrièra partida de la primièra fasa. Coma los punts del classament comptaràn per la segonda fasa, lo Tolosa Olimpic demòra en bona plaça per la seguida de la competicion e mai que jamai en corsa per montar en Championship.
 
 
E un novèl president
 
Dissabte de matin, a Tolosa, i aguèt pas de besonh d’anar fins al punt d’aur per trapar lo nom del president de la Federacion. Marc Palanques, cap de fila de XIII Units, placèt largament en cap del vòte la lista de sos 24 candidatas e candidats e metèt atal un tèrme a la presidéncia de Carlos Zalduendo. Las òbras qu’espèran la novèla direccion son importantas: format dels campionats d’Elèit, esquipa de França competitiva per la Copa del Mond de 2017, espandiment del movement, desvolopament de la formacion...
 
 
 
 
Alan Roch