Bandièra01 1180x150: Comuna de Tolosa

Actualitats

Rugbi de XIII: los Dragons en posicion “pausa”

| catalansdragons.com
D’occitans que rison, de catalans que lagremejan: atal se pòt resumir la dimenjada tretzista amb la fin de la primièra fasa de Liga Una sens una desfaita pel Tolosa Olimpic e lo sus-plaça pietadós e inquietant marcat per una novèla desfaita dels Catalans en Super-Liga.
 
 
Entre las urpas dels Tigres
 
Aqueste dimenge, los Dragons jogavan a Castleford. Comptavan sul retorn del mesclanha Myler per balhar vam a l’ensemble. Mas tornèron tombar dins los pecats ancians: primièr temps equilibrat, dos ensags refusats a la vidèo, puèi dos ensages preses just abans la pausa (20-6) e un al retorn. Lo trauc èra fait e los Tigres ganhèron 38-24.
 
Los Dragons demòran quatrens al classament, mas St-Helens (que bat just Widnes 12-10) torna a dos punts a doas jornadas de la fin. Es imperatiu pels Dragons de batre Wakefield dissabte a Brutus per servar aquesta plaça de quatren, importanta en vista de la segonda fasa.
 
Wigan es ara cap de fila aprèp sa victòria sus Wakefield 22-18 e la susprenenta desfaita d’Hull-FC sus sa pelena fàcia al darrièr Leeds 20-15; Hull-KR ganha d’un punt 20-19 fàcia als Gigants d’Huddersfield e Warrington bat aisidament 40-14 Salford que recuperarà pas sos sièis punts de penalitat.
 
 
Tolosa sus sa lançada
 
Lo Tolosa Olimpic jogava dissabte lo darrièr rescontre de la primièra fasa de Liga Una. L’emportèt aisidament cò dels London Skolars: 52-12. Viran atal amb tretze victòrias e una egalitat cap a la segonda fasa amb los 8 primièrs que se rescontraràn un còp de mai. Los dos primièrs jogaràn la montada dirècta en Championship, l’anticambra de la Super-Liga. Lo perdent se poirà ratrapar amb un barratge qu’i prendràn part tanben los 3en, 4en e 5en per la segonda montada.
 
 
Tresen Estats d’Origina de l’an
 
En Austràlia, aquò es dotze punts, sens parlar de l’emenda, que perdon las Anguialas de Paramatta per aver despassada la massa salariala. Aquò afècta pas lo grop sus la pelena que bat los Poletons: 22-18.
 
Mas l’eveniment de la setmana es la tenguda del tresen Estats d’Origina aqueste dimècres 13 de julh a l’ANZ-Estadium de Sydney. Una partida per l’onor, vist que los Marrons de Queensland se ganhèron las doas primièras confrontacions, mas los Blaus de Novèlas-Galas se voldràn balhar rasons d’esperar per las sasons venentas.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article