Bandièra01 1180x150: Comuna de Tolosa

Actualitats

crotz-tolosaCreated with Sketch.Comtat de NiçaCostiera Niçarda

Nuèch d’orror a Niça

La vila es brandida per un brutal atemptat qu’a fach mai d'ochanta mòrts. Prepausam qualques informacions, vidèos e ligams d’interès

Ièr de ser, a Niça, un individú que menava un camion se roncèt sus la molonada. A l‘ora d’ara, i a ochanta quatre mòrts e dètz e uèch ferits grèus.


Que ne sabèm?
 
A 22.30, un grand camion blanc se lancèt contra de milièrs de personas que i aviá sul Camin dels Angleses de Niça, al bòrd de la platja, qu’èran ailà per veire los fuòcs d’artifici del 14 de julhet. Sus la mapa se vei lo Camin dels Angleses, l’ostalariá Negresco —ont la polícia ensagèt d’arrestar lo camion pel primièr còp— e lo ponch ont l’arrestèron definitivament, après un escambi de fuòc, que s'acabèt amb la mòrt del menaire. En total, lo veïcul percorreguèt dos quilomètres en tuant de mond.
 
 
 
Lo menaire del camion portava un pistolet e tirèt contra la molonada e contra los policièrs. Tanben portava de fusilhs e de grenadas falsas. Los agents l’an tuat.
 
Dins lo camion an trobat mai d’armas e los documents d'identitat del menaire. Segon Nice-Matin, s’agís d’un ciutadan niçard de trenta un ans, d’origina tunisiana.
 
La prefectura dels Alps Mediterranèus a qualificat los faches d’atemptat, mas sens los ligar oficialament a cap d’organizacion.
 
François Hollande a parlat aquesta matinada a 3h30 per la television, a qualificat los faches d’atemptat, a dich de manièra fòrça significativa que “França viu jos la menaça del terrorisme islamista” e a anonciat que l’estada d’emergéncia serà perlongat tres meses.
 

 
 
Que ne sabèm pas encara?
 
Se sap pas cossí lo camion a pogut intrar dins lo Camin dels Angleses, qu’èra barrada a la circulacion.
 
Segon qualques testimònis i auriá agut mai d’una persona dins lo camion, mas i a pas cap d’informacion de la polícia qu’o verifique.
 
I a de comptes de Twitter e Facebook restacats a de grops jihadistas qu'an exprimit lor jòia per l’atac, mas i a pas cap de comunicat cresable que s’atribuisca l’atemptat.
 
 
I a de vidèos del moment de l’atac?
 
Un fum de mond enregistrèron d’imatges de l’atemptat sus plaça amb lors telefòns mobils. Se pòt trobar fòrça d’aqueles imatges sus Internet. I a d’enregistraments que mòstran los mòrts long del Camin dels Angleses amb fòrça detalhs, mas per respècte per las victimas los publicarem pas aicí. Per contra, publicam en seguida un vidèo que mòstra cossí qualques personas ensajan d’arrestar lo camion, del temps qe lo veïcul accelèra. Sembla un testimoniatge important.
 

 
 
Dins aquel autre vidèo se pòt sentir los còps de fuòc dels policièrs e de l’assalhidor, e las convèrsas de las personas que cèrcan un abric.
 

 
 
Que se passarà totara?
 
Lo president de la Republica francesa, François Hollande, anarà a Niça ont lo ministre de l’interior es ja arribat.
 
Lo govèrn francés a cridat totes los reservistas de l’armada e la gendarmariá per refortir la seguretat.
 
L’estat d’emergéncia, declarat en França après los atemptats de novembre a París, expirava lo 26 de julhet. Ara Hollande a anonciat que lo mantendrà encara 3 meses.
 
Lo govèrn francés intensificarà los atacs en Iraq e Siria.
 
A Niça an anullat totas las activitats e an barrat l’accès al Camin dels Angleses.
 
 
Ont podètz ne trobar mai d'informacions?
 
Recomandam especialament de legir l’article de Damien Allemand, jornalista de Nice-Matin e son testimoniatge del masèl. Podètz legir l’article en francés sus son blòg o sa traduccion en catalan que la prepausa Vilaweb.
 
Los mejans locals coma Nice-Matin o quitament d’autres mèdias occitans d’expression francesa coma La Provence, Midi Libre, La Dépêche, La Montagne o Sud-Ouest rapòrtan los faches amb fòrça detalhs. Se seguir tanplan los mèdias estatals franceses, notadament
Le Monde, Libération o Le Figaro. Tanben se pòt seguir las televisions consagradas a las informacions coma France24 e BFMTV.
 
Podètz consultar lo sit web de la comuna de Niça, e seguir sus Twitter l’etiqueta #AttaquesNice.


Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article