Bandièra01 1180x150: Comuna de Tolosa

Actualitats

Catalonha e Aran: un pache al Parlament per avançar devèrs l’independéncia

JxSí e CUP an presentat un tèxt conjonch que permeta la desconnexion d’Espanha d’un biais unilateral, se l’estat espanhòl refusa de negociar

Los dos grops independentistas del Parlament de Catalonha Junts pel Sí (JxSí, Amassa per l’Òc) e la Candidatura d’Unitat Populara (CUP) an presentat un tèxt conjonch per metre en marcha “un mecanisme unilateral d’exercici democratic” devèrs l’independéncia. Çò es una modificacion del fuèlh de rota del procès d’independéncia de Catalonha e Aran, que permeta la desconnexion d’Espanha d’un biais unilateral, se l’estat espanhòl refusa de negociar.
 
Los dos grops parlamentaris presentèron divendres lors conclusions, e diluns metèron lors escriches en comun. Ièr dimars, lo burèu del Parlament aprovèt lo tèxt.
 
Lo tèxt compren una primièra fasa de procès participatiu, una de desconnexion amb l’estat espanhòl amb la convocacion d’eleccions constituentas que formaràn una Assemblada Constituenta per redigir la futura Constitucion de Catalonha e Aran, e una tresena per la ratificar via referendum.
 
Es en aquela segonda fasa que se precisa que la desconnexion de la legalitat de l’estat espanhòl se farà a travèrs de l’aprobacion de qualques leis de desconnexion que deu aprovar lo Parlament de Catalonha, e “d’un mecanisme unilateral d’exercici democratic que servirà a activar la convocacion de l’Assemblada Constituenta”.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article