Bandièra01 1180x150: Comuna de Tolosa

Actualitats

Hollande confirma que França es en guèrra e precisa que “serà una guèrra longa”

Un dels assassins del paire Hamel portava un braçalet electronic e aviá ensajat dos còps d’anar en Siria

Lo president francés, François Hollande, a ratificat que lo país es en  “guèrra” contra lo terrorisme, après l’atac perpetrat dimars passatdins una glèisa de Normandia, e mai a precisat que serà una “guèrra longa” perque “la menaça contra França e Euròpa jamai es estada tan importanta”.


Après l’atac de dimars passat a Normandia, revendicat per l’Estat Islamic, ont dos terroristas prenguèron de fisèls e de religiosas en ostatges e assassinèron lo prèire Jacques Hamel, lo president francés, François Hollande, mandèt un brèu messatge als ciutadans franceses de l’Elisi estant.
 
“Tuar un prèire es profanar la Republica que garentís la libertat de consciéncia […]. Los catolics de França e de tot lo Mond son ferits e totes los franceses se senton atacats”, çò diguèt lo cap de l’estat.
 
Per Hollande s'agís d’una autra pròva que “França es en guèrra” contra lo terrorisme, “en una guèrra a l’estrange” contra los grops armats qu'agisson en Africa e a l’Orient Mejan e “en una guèrra a l’interior contra la radicalizacion”.
 
“E seguirem, mas vos dirai la vertat, aquela guèrra serà longa”, çò afirmèt. “La menaça contra França e Euròpa jamai es pas estada tant importanta”, çò soslinhèt, en allusion als atemptats perpetrats, non solament dins l’estat francés, mas tanben en Alemanha.
 
Lo govèrn francés “mobilizarà totes los mejans umans e materials” e “aplicarà la lei amb mai de fermetat”, çò prometèt, mas soslinhèt que “restrenherà pas las libertats ni abolirà las nòrmas constitucionalas” perque aquò “portariá pas d’eficacitat a la lucha contra lo terrorisme”.
 
“La nòstra democracia es la tòca e la nòstra democracia serà lo nòstre bloquièr”, çò afirmèt. “La nòstra unitat serà la nòstra fortalesa. Nos cal far front comun per ganhar aquesta guèrra que, vos o asseguri, la ganharem”.
 
 
Un dels terroristas portava un braçalet electronic
 
Un dels assassins del paire Hamel èra estat mes en libertat en març passat, jos braçalet electronic, un dispositiu concebut per que las autoritats s’asseguren de la preséncia del condemnat a son domicili a cèrtas oras determinadas pel jutge. En mai d’aquò, aviá ensajat d’anar en Siria en divèrsas escasenças, segon çò que rapòrta Le Figaro.
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Amadeus Wein
5.

#4 Carlo da Ponte ? Ieu coneissiái melhor Lorenzo da Ponte, autor del libret de "Le nozze di Figaro", lo qu'escriguèt aqueste passatge. E non, ma paura comtessa, non sèm pas en guèrra. E mai se sèm de ciblas per unes descabestrats qu'an perdut tota amira religiosa per descaire dins lo fanatisme, aitant plan coma i èra caiguts los capbords franceses de la crosada contra las tèrras raimondina d'Occitania.

  • 9
  • 1
comtessa de Dia
4.

se siam pas en guerra, lei musulmans sunitas dins sa modalitat salafista lo son : contra lo mond entier. e aquelei cafalots son religios. E per eli la moart represe una promocion, coma per nautres , la legion d'onor e la medalha militar; se faire sautar lo caisson amb lo pus grand nombre possible de maucresents es lo passaport per lo paradis, via directissima. que pot la sciéncia miltar contra tala monstruositat ? Cherubino, a la vittoria, a la gloria militar... non puo andare, farfallone amoroso notte e giorna d'intorno girando, delle belle torbando il riposo..aquo se cantaz, la musica ei de Mozart e lei paraulas de Carlo de Ponte

  • 4
  • 9
Emmanuèl Isopet
3.

Sèm en guèrra ?
1) Una guèrra es un conflict armat entre estat. Dins aqueste cas caldriá reconéisser l'Estat Islamic ; seriá lor far un tròp grand aunor. Per aquò, podèm pas dire que sèm en guèrra.
2) Un autre tipe de guèrra es la guèrra civila. Es una partida dels ciutadans que se baton contra una autra. Se vei plan que lo problèma es al delà de las termièras del país, es pas un problèma entre franceses. Donc es pas una guèrra civila.
3) D'unes politicians parlan de « guèrra contra lo terrorisme ». Lo terrorisme es un mejan d'accion, sovent utilizat per l'adversari mai fèble per aflaquir lo mai fòrt. Los resistents pendent l'ocupacion nazi, lo FLN, lo FLNC foguèron totes tractats de terroristas perque utilizavan los mejan d'accion de la guèrra assimetrica. Certas armadas utilizèron aqueste mejan tanben (los penjats de Tulas, los bombardaments de Londres e Dresde, ...). Lo terrorisme estant un mejan d'accion pòt pas èsser un enemic. Podèm pas èsser en guèrra (levat al sens metaforic) contra lo bombardament nuclear, contra l'espionatge, contra las minas…
Per totas aquelas rasons me sembla que podèm pas dire que sèm en guèrra, levat dins l'amira d'un plan de comunicacion qu'a pas grand causa a veire amb la realitat.

  • 4
  • 0
Guilhèm Thomas Tolosa
2.

Una democracia e una unitat que se pòt resumir en doas chifras : 49.3

  • 12
  • 5
Lachaud
1.

Plan segur chau se defendre contre lo terrorisme. mas la Franca Socialiste, la Franca Petainista, la Franca de Tiers apela a l'Union Nacionala en commençant per l'estat d'urgença, en interdisan las manifestacions e en se catan darrier de las valors de la Republica, sacradas e universalas.
I a belcòp tròp d'ambiguitat dins los discors.

  • 8
  • 0

Escriu un comentari sus aqueste article