En mens de mièja annada, lo govèrn de l’Estat espanhòl a ensajat de conténer la crisi economica amb divèrsas reformas. La tresena se concretizèt divendres passat amb la creacion d’una “banca marrida”, o banca de mesfisança, que s’i transferirà los actius immobilièrs toxics e, aital, que s’ensajarà de conténer lo problèma de la descapitalizacion de las bancas espanhòlas, estofadas per la depreciacion dels lors actius en bastiments.

Lo Reial Decret-Lei de Restructuracion e Resolucion de las Entitats de Crèdit foguèt anonciat pel Ministre de l’Economia e la Competitivitat, Luis de Guindos, qu’a nuançat reïteradament en dire que lo còst d’aquelas mesuras aurà un “impacte minim” suls contribuents del temps que, qualques minutas abans, la vicepresidenta del govèrn, Soraya Sáenz de Santamaría, assegurava qu’aquò “costariá pas un èuro” als espanhòls.
 
La reforma nòva autreja de competéncias al govèrn per barrar las bancas que se considèren “inviablas”. Tanben exigís d’aumentar los fonzes de las bancas fins a 9% del lor capital, transferís e aumenta las competéncias que la Banca d’Espanha pòt exercir sul sistèma bancari de l’Estat e, entre d’autres, regular los salaris que pòdon recebre los executius de las bancas intervengudas fins a un maxim de 500_000 èuros per an.
 
Sus la quantitat de fonzes que requeriràn las bancas espanhòlas en cas de problèmas, lo ministre De Guindos gausèt pas a avançar cap d’estimacion pr’amor que, çò apondèt, las chifras concretas “se coneisseràn dins 15 jorns quand las entrepresas d’audit liuraràn lo rapòrt encargat de realizar un diagnostic concís”.
 
La dicha “banca marrida” aurà fins a 15 ans per ofrir al mercat los actius toxics pel sistèma financièr espanhòl (es a dire, vendre los immòbles), en tot esperar que se recupère los fonzes.