Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaComengeCoserans

Salau: recòrd de personas per l’amistat occitanocatalana

Los dètz ans d’oficialitat de l’occitan en Catalonha e Aran an marcat l’eveniment

| CAÒC
Fa ja 29 ans qu’occitans e catalans se retròban lo primièr dimenge d’agost en la tradicionala pojada al Pòrt de Salau, a 2100 mètres d'altitud. Los occitans partisson de Salau (Coseran) e los catalans de la vila catalana d’Esterri d’Àneu. L’amassada, organizada pel CAÒC e per l’ASPIC, es venguda un simbòl d’amistat e de revendicacion nacionala dels dos pòbles vesins. Aquela revendicacion, ongan s’es refortida amb la commemoracion dels dètz ans d’oficialitat de l’occitan en Catalonha e Aran, e a comptat amb la participacion de Mireia Boya, deputada aranesa al Parlament de Catalonha e opinanta de Jornalet.
 
Ongan, lo bèl temps a favorit la participacion, qu’a comptat mai d’800 personas segon Núria Ontiveros, presidenta del CAÒC. Aquò es una participacion recòrd favorida per “una presa de consciéncia màger del moment que sèm a viure e de la situacion de fòrça nacions coma la nòstra”, segon çò qu’explica lo CAÒC dins son comunicat de premsa.
 
Coma totjorn, se faguèt d’actes d’afrairament, d’escambis de produches dels dos terraires, de danças tradicionalas, de discorses de benvenguda, e fin finala s’issèt las bandièras de las doas nacions del temps que lo mond cantavan Se Canta e Els Segadors. Dins los discorses, se parlèt de l’independéncia de Catalonha e Aran, “ua naua republica que serà formada per dus trocets de dues nacions”, çò precisèt Mireia Boya, en fasent referéncia al fach que lo Principat de Catalonha fa partida dels Païses Catalans e qu’Aran fa partida d’Occitània. Del costat de l’ASPIC, la portavotz de l’associacion coseranesa remarquèt l’importància que la nòva region fruch de la fusion de Lengadòc-Rosselhon e de Miègjorn-Pirenèus se nomene “Occitània”. Ara, lo CAÒC e l’ASPIC se meton al trabalh per festejar l’an que ven lo 30n anniversari de l’eveniment.
 
L’emplaçament d’aquel pòrt es simbolic: s’agís d’un camin natural entre Occitània e Catalonha qu’a servit istoricament per connectar los dos pòbles.
 
Per arribar al pòrt, als occitans lor cal caminar tres oras del temps que los catalans sonque marchan 45 minutas. Es per aquò que tradicionalament los occitans i pòrtan lo formatge e los catalans lo vin.
 
 
Collòqui suls dètz ans d’oficialitat de l’occitan en Catalonha
 
Abans la pojada al pòrt, del costat catalan se tenguèt dissabte, a Esterri d’Àneu, un collòqui interessant menat per Mireia Boya e Marçal Girbau suls dètz ans d’oficialitat de l’occitan, amb una remarcabla participacion del public que faguèt d’apòrts nombroses e interessantas. De soslinhar lo planh general devèrs lo govèrn de Catalonha que deuriá tractar l’occitan coma las autras lengas oficialas e o fa pas. Tanben se destaquèt lo besonh que la societat catalana prenga consciéncia de l’existéncia e de l’oficialitat de l’occitan, qu’es tanben una lenga del país.
 
En mai d’aquò, se tenguèt una projeccion del documentari Aqueth dia i auie ua nòça, que reviu l'invasion mancada de la Val d’Aran pels maquises en 1944 amb la tòca de tombar lo regim de Franco.
 
 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
5.

No cal tenir por, Catalans i Occitans som germans, per tant fora desconfiences, i males cares, tots estem en aquesta lluita, i l'hem de fer junts. Unitat! I fora mals rotllos.
No em i han fet mai res en contra entre nosaltres.
Per tant: Units guanyarem!
Visca la Terra...LLIURE!
L'Ernest, "El Tàrrega".

  • 0
  • 0
Alari Agen
4.

#2 l'imperialisme que ne patisson los occitans e los catalans dins la novèla region es l'imperialisme francés e pas cap d'autre. Se cal pas enganar d'enemic. Vertat es, una denominacion melhora seria estat "Occitània centrala- Pais catalan o Catalonha Nord" De tot biais, sabèm totes qu'Occitània se limita pas a la novèla region e incluis pas Rosselhon. Los catalans del Nord an drech a una collectivitat territoriala especifica. Los ciutadans son estats consultats e an votat per "Occitània". Segur, i a encara lo barratge del Conselh d'Estat e del govèrn. Lo recors dels catalans al Conselh d'Estat risca de li far refusar a l'encop Occitània e Pais catalan. De mai, lo nom de las regions occitanas o mièg-occitanas es pas lo problèma essencial, quitament s'es important al nivèl simbolic, las regions de la republica "francesa" contunhan d'èsser des nans sens moneda e poders vertadièrs raport a lors vesinas catalanas e bascas e om apèla regions de nacions al sens etnic del tèrme. Mas se sap que dins la republica una e indivisibla i a pas qu'una nacion, la nacion francesa e una sola lenga lo francés. Amics catalans mèfi a pas desrevelhar l'antagonisme entre pobles. Pensi a ma joinessa ont los lengadocians tractavan los catalans de gavachs e vice-versa. Vos cal far coma vostres vesins catalns de la Generalitat.

  • 1
  • 0
Sidarta
3.

#1 El problema es pas el nom de la regió, sinó en la regió en si. L'única denominació imperialista que teniu els nordcatalans és "Republique Française" a les vostres cartes d'identitat. Us enganyeu d'enemic, sem pas els occitans, mon fraire

  • 6
  • 0
Cedric
2.

#1

E la Val d'Aran, es en Catalonha o en Occitània ? E los emetors de las ràdios nòrd e sud catalanas que difusan fins a Narbona, es pas d'imperialisme catalan en Occitània ? D'unes Catalans del nòrd que i a demandèron a las gents de participar pas a la consultacion ciutadana qu'organizèt l'anciana region. E aquelas personas venon ''romegar'' ara ?? E d'aquela accion, ne parlam ? http://france3-regions.francetvinfo.fr/languedoc-roussillon/dans-les-po-les-elus-rejoignent-les-militants-de-oui-au-pays-catalan-1058219.html Aquí çò escrit dins l'article: ''A bord d’une jeep militaire, ils arrachent symboliquement un panneau « Occitanie » pour le remplacer par un « Pays catalan » sous les applaudissements''. Vos cal veire tanben la primièra fòto de l'article qu'es remirabla ...

  • 0
  • 0
Alà Baylac Ferrer Perpinyà
1.

Realment l'ASPIC se felicita que la nova regió de Tolosa se digui "Occitània" ?! És un oblit de l'autor de l'article o de veritat ningú s'ha escandalitzat d'una denominació imperialista que pretèn esborrar els nord-catalans del mapa ? Esperi amb molta impaciència la resposta...

  • 2
  • 6

Escriu un comentari sus aqueste article