Bandièra01 1180x150: Comuna de Tolosa

Actualitats

Rugbi XIII. L’ASC XIII serà representanta de Carcassona, de tota la contrada e de las valors occitanas

Çò diguèt Joan Guilhem, president de l'esquipa, en presentar la campanha d'abonament lançada pel club divendres passat

Afichas per l’abonament a las partidas de l’ASCarcassona XIII
Afichas per l’abonament a las partidas de l’ASCarcassona XIII
Lo Castilhet mai fòrt que Castleford! Dimenge, sus la pelena de l’esquipa anglesa, los Dracs an pas fait dins lo detalh: 30-12 a la pausa e 46-26 al tèrme d’un vertadièr festenal ofensiu amb 8 ensags de marcats amb lo còp del capèl per l’alièr Damian Blanch e l’arrièr Clint Greenshields. Lo Scott Dureau ensaquèt 7 transformacions.
 
Los Dracs confòrtan atal lor quatrena plaça al classament mas la victòria demora imperativa dissabte a 4 oras del vèspre a Brutús fàcia a Bradfòrd per la servar o benlèu acabar tresen. Aquò voldriá dire un primièr torn de las pelhòfas a Wigan o Warrington; mas en cas de desfaita, una segonda chança amb una partida de barratge que se jogariá a Brutús.
 
De notar qu’A Castleford, dos joves jogaires integrèron los Dracs pel primièr còp : Kevin Larroyer e Antòni Maria. En Anglatèrra, cal sotalinhar la supèrba victòria de l’esquipa de França de XIII-fautuèlh fàcia a Anglatèrra: 44-22, obtenguda dimenge passat 27 d’agost. Un revenge es previst pel 30 de març de 2013 a Tolosa, abans de novèlas confrontacions al moment de la Copa del monde de la tardor de 2013.
 
Las esquipas d’Elita entamenan una tièra de rescontres amicals abans la dimenjada magica de Lesinhan, lo dissabte 22 e lo dimenge 23 de setembre.
 
Dijòus, los Dragonets an perdut fàcia als mens de 20 ans de Featherstone: 44-22.
 
Divendres, Carcassona a fait una granda revista d’efectiu fàcia al campion d’Elita 2, los Catalans de Palau. Victòria de l’ASC: 38-4, mas la formacion audenca es en cèrca d’un joquèr medical per jogar a la mesclanha en plaça d’Eamon Hillen que serà ausent tres o quatre meses per una operacion a la camba e la convalescéncia.
 
Dissabte, Pià es anat a batre Limós: 38-20.
 
Aquesta setmana, per Carcassona, serà un estagi-comandò de tres jorns amb los paracaudistas del 3en RPIMA.
 
Del costat de Vilanòva, aqueste dimenge 9, un grand omenatge serà rendut a un grand cap-davantièr del XIII: lo Max Rousiè, lo Maxon, que son nom es aquel del bloquièr dels campions. Una partida amicala Vilanòva-Tolosa clavarà la jornada.
 
E aquesta setmana, las doas cadenas de BeinSport passaràn rescontres de la darrièra jornada de la fasa de classament del campionat australian de la NRL.
 
Dins una conferéncia de premsa cò de Felix a Carcassona, divendres 31 d’agost de matin, lo president de l’ASC XIII lo Joan Guilhèm presentèt la campanha d’abonament lançada pel club qu’a partir de començament d’octòbre beneficiarà de tribunas totas novèlas e totas bèlas a l’estadi Domèc. Presentèt lo portal Internet que recampa totas las compausantas del monde tretzista de Caracssona.
 
Quand se li parlèt dels objectius per l’an, diguèt qu’èra d’ensajar de faire coma la sason passada (lo dobat!) mas tanben de se mostrar fòrts dins la Cup anglesa e de passar se possible dos torns. Amb lo sòmi de reçaupre una esquipa de Super-Liga a Carcassona! Diguèt que fins aquesta competicion, l’esquipa seriá representanta de Carcassona, mas tanben de tota la contrada e de las valors occitanas.




Alan Roch

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article