Totjorn dins l’encastre per resòlvre l’afar del Brexit, la primièra ministra d’Escòcia, Nicola Sturgeon, refiulèt dissabte passat sus Twitter un article d’un think-tank de Danemarc que fa una proposicion novèla. En partissent de l’experiéncia danesa e de la sortida de Groenlàndia de l’alavetz Comunautat Economica Europèa, lo professor Ulrik Pram Gad prepausa, dins un article publicat sul sit de la London School of Economics and Political Science, que lo Reialme Unit active pas l’article 50 dels tractats e que sián Anglatèrra e Galas los dos païses que quiten l’Union Europèa, en permetent aital que i demòren Escòcia, lo nòrd d’Irlanda e Gibraltar.
 

Interesting piece by a Denmark based academic - Could a ‘reverse Greenland’ arrangement keep Scotland in the EU? https://t.co/pobSSDfTY2

— Nicola Sturgeon (@NicolaSturgeon) 13 d’agost de 2016

 
 L’article remembra qu’e mai se Groenlàndia fa partida del Reialme de Danemarc e constitucionalament parteja lo meteis quadre juridic, dins l’Union Europèa an de posicions desparièras. Danemarc fa partida de l’Union Europèa mas Groenlàndia non. Aquel fach a pas creat cap de problèma pr’amor que totes los estats membres ratifiquèron un protocòl que permetiá aquel cambiament e Danemarc reconeguèt a Groenlàndia la capacitat de prene aquela decision, e doncas, de signar los tractats internacionals necites dins aquel sens.
 
L’article de Gad prepausa ara una linha de trabalh semblabla pel Reialme Unit. Dins aquel sens demanda que lo Reialme Unit contunhe de far partida de l’Union Europèa e qu’Anglatèrra e Galas, los dos territòris ont ganhèt lo “non”, quiten l’UE, en seguissent la via groenlandesa. Gad insistís sus lo pragmatisme de l’Union Europèa a l’ora de negociar per soslinhar qu’aquela solucion seriá ben possibla e satisfariá totas las parts.