Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Eth hestivau Barnasants que s’inaugurarà ena Val d’Aran

A prepaus des 800 ans dera Batalha de Murèth eth hestivau barcelonés dera cançon que se vò centrar enes relacions occitanocatalanes

Eth sindic d’Aran, Carlos Barrera, e eth director deth hestivau de Barnasants, Pere Camps
Eth sindic d’Aran, Carlos Barrera, e eth director deth hestivau de Barnasants, Pere Camps | CGA

En escadença des 800 ans dera Batalha de Murèth eth hestivau de cançon de Barcelona, Barnasants, que se centrarà enes relacions occitanocatalanes e que s’inaugurarà ena Val d’Aran, damb era participacion d’artistes occitans e catalans e en collaboracion damb es hestivaus Sèm e Serem e era Estivada de Rodés. En 2013 Era Val d’Aran que hestège tanben es 700 dera Querimònia e es 500 deth Plan d’Arrem de Lies e Patzeries.


Diuendres passat eth sindic d’Aran, Carlos Barrera, e eth director deth hestivau de Barnasants, Pere Camps, que s'amassèren entà definir es actes d'inauguracion dera 17au edicion deth hestivau dera cançon de Barcelona, que se debanarà es dies 25 e 26 de gèr ena Val d'Aran, e que se centrarà enes relacions occitanocatalanes.
 
Eth Hestivau de Cançon Barcelona 2013 que coïncidís damb era celebracion des 800 ans dera Batalha de Murèth. Era des·hèta des fòrces occitanocatalanes deuant es franceses qu'auec ua importanta transcendéncia ena evolucion istorica des dus pòbles. En tot profitar eth lideratge institucionau dera Val d'Aran en aguestes relacions istoriques, Barnasants que prepausèc ath Conselh Generau d’Aran qu'era inauguracion de 2013 se hesse en aqueth país occitan damb era participacion d'artistes catalans e occitans, e en collaboracion damb es hestivaus Sèm e Serem e era Estivada de Rodés.
 
Entara Val d'Aran 2013 b'ei un an fòrça especiau. Per un costat se hestège eth 700au anniversari deth tractat dera Querimònia, carta magna signada per Jaime II d'Aragon que constituís eth drèt istoric d'Aran. Per un aute costat se hestègen tanplan es 500 ans dera signatura en Hòs der acòrd deth Plan d’Arrem de Lies e Patzeries, a on es territòris d'Aran e deth canton de Sent Biat s'engatjauen a signar era patz, a non interrómper es relacions comerciaus e a agir amassa en cas de guèrra entre França e Espanha.




CGA / FM

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article