Bandièra01 1180x150: Comuna de Tolosa

Actualitats

Un cinquantenat de mòrts dins un atemptat durant la celebracion d’un maridatge en Turquia

Los nòvis èran de militants del Partit de la Democracia del Pòble (HDP), un partit d’esquèrra pròcurd, amb representacion a l’Assemblada turca

Almens un cinquantenat de mòrts e mai de cent ferits es lo darrièr bilanç de l’atemptat que se debanèt dissabte de ser dins la vila de Gaziantep, dins l’estat turc a 45 Km de la frontièra siriana. Un kamikaze se faguèt espetar mentre que se dançava per carrièras per festejar un maridatge, coma es tradicion al país.
 
Los nòvis èran de militants del Partit de la Democracia del Pòble (HDP), un partit d’esquèrra pròcurd, amb representacion a l’Assemblada turca.
 
Lo viceprimièr ministre de Turquia, Mehmet Şimşek, a indicat en de declaracions a la cadena NTV que l’atemptat foguèt perpetrat per un kamikaze, e lo deputat Şamil Tayyar, del partit del Govèrn —Justícia e Desvolopament (AKP)— a atribuit l’explosion al grop jihadista autoproclamat Estat Islamic.
 
 
Erdoğan compara l’Estat Islamic amb las guerrilhas curdas
 
Un còp de mai, lo president turc, Recep Tayyip Erdoğan, s'es servit de l’atemptat per atacar lo pòble curd e lo clèrgue opausant Fethullah Gülen. Dins un comunicat, Erdoğan a condemnat l’atemptat, l’a atribuit a l’Estat Islamic e a comparat aquela organizacion als milicians curds e tanben als partisans de Gülen.
 
Ça que la, segon l'afilhament politic dels nòvis assassinats, es fòrça probable que las victimas foguèsson de curds.
 
 
Los curds perseguits per Erdoğan e per l’Estat Islamic
 
 
Los curdes son estats responsables de las recentas desbrandas de l'Estat Islamic dins la guèrra de Siria. Una de las darrièras es estada la liberacion de la vila de Manbij, fa mens de doas setmanas, que l'a quitament festejada la comunautat curda de Marselha.
 
 
Lo Partit de la Democracia del Pòble (HDP)
 
Lo Partit de la Democracia del Pòble (HDP), amb 59 deputats sus 550 dins l’Assemblada turca, es un partit d’esquèrra considerat per qualques analistas coma lo Syriza turc. Defend las valors de trabalh, egalitat, libertat, patz e justícia en oposicion a las “fòrças racistas, nacionalistas, militaristas, sexistas, conservatrises e mercantilistas”. Reconeis lo ròtle dins la societat de tot individú o grop, independentament de sa lenga, religion, color, raça o diferéncia sexuala, e en particular dels obrièrs, dels païsans, dels petits comerçants, de las femnas, dels joves, dels intellectuals, dels artistas, de las personas LGBT, dels andicapats, dels oprimits e dels esplechats, delà lors nacion, lenga, etnia dins un Mond equitable, liure, uman e just.
 
Erdoğan a atacat plusors còps l’HDP e l'a qualificat d’“abric de terroristas”.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article