Bandièra01 1180x150: Comuna de Tolosa

Actualitats

Los govèrns de l'UE prometon l’unitat e mai de seguretat per recuperar lo sosten dels ciutadans

Se son entenduts per corregir d'errors e recuperar la fisança dels ciutadans en lo projècte europèu abans de celebrar en març los 60 ans del Tractat de Roma

Los caps d’estat e de govèrn de l'Union Europèa sens lo Reialme Unit fixèron divendres passat las grandas linhas d’una fuèlha de rota pels sièis meses a venir, dins la quala cèrcan de demostrar lor unitat e aspiran a un refortiment de la seguretat dins las frontièras contra l'immigracion e la menaça terrorista, que convenca los europèus de la viabilitat del projècte europèu.
 
“Nos sèm meses d’acòrdi per consagrar totes los esfòrces d’Euròpa per nos ocupar de las causas qu’inquietan lo mond. Las gents vòlon de seguretat e aquò es çò que demandan a lors governants”, çò declarèt lo president interimari del govèrn espanhòl, Mariano Rajoy, en aquela reünion informala tenguda a Bratislava.
 
Dins la meteissa linha, la cancelièra alemanda, Angela Merkel, soslinhèt la tòca de l'Union Europèa d’“arrestar l'immigracion illegala” o “almens de la reduire significativament”.
 
“Sèm consents que non permetrem jamai pus que tòrnen los fluxes migratòris sens contraròtle”, çò diguèt lo president del Conselh Europèu, Donald Tusk, en referéncia a un dels engatjaments clau de la nòva “fuèlha de rota de Bratislava”.
 
La mençon iniciala d'evitar que se repetisca lo “caos” de 2015 s'adociguèt pel malèsser de qualques delegacions a prepaus d'aquela expression, dont Alemanha.
 
“Sèm determinats a corregir las errors passadas e a cercar de solucions comunas”, çò apondèt Tusk, fisançós que dins los sièis meses que venon se complirà la fuèlha de rota marcada e que se conclurà lo protocòl en març, quand los estats membres festejaràn a Roma los 60 ans del projècte europèu.
 
De son costat, lo primièr ministre chèc, Bohuslav Sobotka, expliquèt que i aviá una entenduda sus una fuèlha de rota iniciala per “refortir la fisança dels ciutadans en lo foncionament de l'UE”.

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc Palma
6.

La destra europea, los mateissos banquiers laires dels diners públics, desfressats de franciscans.

  • 0
  • 0
Socrates
5.

De la securitat, ne nos fotèm : çò que volèm es la democracia, lo poder de decidir en Euròpa de la politica economica. Tant qu'aqueste poder nos demorarà confiscat, nos fisarem pas mai a degun darrièr una carvata europèa…

  • 1
  • 0
Pirolet
4.

Amb totes los avertiments qu'an agut ja an pas bolegat d'un pel de lor linha que matrassa la planeta e la pauralha. Digús lor fa pas pus fisança e los populismes trucan a las pòrtas d'un fum de países.

  • 3
  • 0
Jòrdi Sant Andrieu de Ròcalonga
3.

Son de parladissas....
Paraulassas...

  • 5
  • 0
Lo Muòl
2.

Plan paure es lo que pòt pas prometre !

  • 2
  • 0

Escriu un comentari sus aqueste article