Tolosa manca lo primièr ascensor
 
E òc, lo Tolosa Olimpic somiava d’èsser lo primièr club occitan campion d’Anglatèrra. Sens aver perdut una partida de la sason de Liga Una, recebiá, aqueste dissabte de vèspre sus la pelena de l’estadi de Blanhac, son segond: Rochdale. A la fin de la partida, sòmi envolat e amarum d’una corta desfaita 24-22. E dire que los tolosans menavan 16-0 aprèp un quart d’ora de jòc! Alara, los angleses utilizèron una arma originala: lo portaire d’aiga! Multipliquèron los arrèstes de jòcs e capitèron de faire desjogar los occitans. La montada en Championship passa ara per doas partidas eliminatòrias de ganhar: la primièra tre aqueste dissabte, totjorn a Blanhac, contra York.
 
 
Dragons: decepcion a l’imatge de la sason
 
A Brutus, lo valent Monis, Dragon de la primièra ora, mas tanben Elima e Stewart, portavan pel darrièr còp lo malhòt sang e aur. En aquesta Jornada del Patrimòni, los Catalans dobriguèron las pòrtas del Castelhet e, sens gaire d’oposicion, los Tigres de Castleford anèron pausar sièis còps la pauma dins l’en-but catalan. A un quart d’ora de la fin, quand foguèron menats 34-10, los Dragons se lancèron d'a fons dins un rugbi ofensiu e enlevat. Passèron tres còps, mas èra tròp tard: desfaita 34-28. E probable la pèrda de la cinquena plaça e de la prima qu’acompanha la posicion de cada formacion. Un fin de sason mai que tristoneta...
 
Wigan met la pression sus Warrington en anent batre lo cap de fila 35-28 e se rapròcha a un punt al classament. Logicament, Hull-Fc ganha cò de Wakefield: 18-12 e Leeds a Widnes: 21-8.
 
Demòra una jornada de la fasa de classament: divendres, los Dragons jogaràn a Wigan, St-Helens reçauprà Wakefield e Warrington jogarà cò d’Hull-FC. Dimenge, Castleford-Widnes metrà un punt final a la fasa de classament.
 
Dins los 8 del Mitan, se sap ja que Leeds e Leigh seràn l’an que ven en Superliga. Hull-KR e Huddersfield jogaràn una partida capitala dissabte: lo venceire serà en Superliga, lo perdent passarà pel barratge contra Salford. De Diables en granda dificultat qu’an encara perdut, e sus lor pelena, fàcia a Londres 19-16.
 
 
NRL: Los Vaquièrs son totjorn aquí!
 
En Australia, la logica es respectada e son los quatre primièrs del classament que se trapan en mièjas finalas.
 
Divendres, dins lo revenge de la finala 2015, los Vaquièrs recebián los Broncos de Brisbana. Amb un ensag a cinc minutas del tèrme, Brisbana se vesiá qualificat 20-18, mas Thurston passava la penalitat de l’egalizacion e, dins la prolongacion, desliurava una passa crosada supèrba a son centre que qualificava los Vaquièrs 26-20. Dins la segonda partida, dissabte, Canberra prenguèt lo pas sus las Pantèras: 22-12 https://matchcentre.nrl.com/match/2016/111/20161112820/#match-report .
 
Plaça a las mièjas finalas: divendres, se jogarà Làmias-Vaquièrs e dissabte: Melbourne-Canberra.
 
 
Dimenjada magica a Brutus
 
Revista d’efectiu pel Campionat d’Elèit 1 amb la Dimenjada Magica a Brutus (Perpinhan) que se dobrirà dissabte amb las partidas Tolosa-Sent Gaudenç (14h), Vilanòva-Albi (16h) e Lesinhan-Dragonets (18h). Aprèp la serada festiva, se tornarà trapar dimenge sus la pelena Palau e Avinhon (14h) e lo revenge de la finala Limós-Carcassona (16h).
 
De partidas que seguirà amb un uèlh particular l’entraïnaire de Lesinhan Aurélien Cologni que torna trapar las foncions de responsable del XIII de França amb una preparacion de faire lèu lèu per la recepcion dels angleses lo dissabte 22 d’octòbre a Avinhon. Cal anar de segur a Avinhon, mas lo rescontre serà tanben televisat sus L’Équipe-21.
 
 
 
 
Alan Roch