Bandièra01 1180x150: Comuna de Tolosa

Actualitats

Catalonha: l’occitan serà a l’onor divendres e dissabte a Canet de Mar

Una conferéncia sus Mistral e un maraton de sièis filmes en occitan auràn luòc dins l’encastre de la Mòstra de Cinèma Occitan 2016 e del Correllengua

Dins l’encastre de la Mòstra de Cinèma Occitan 2016, la vila de Canet de Mar (Catalonha) festejarà la lenga occitana aqueste divendres e dissabte que venon, 23 e 24 de setembre. Tanben, aquel omenatge a la nòstra lenga aviarà lo Correllengua a Canet de Mar, una iniciativa populara per la lenga catalana que prepausa cada an d’animacions per totes los Païses Catalans. Organiza aquel eveniment Plataforma per la Llengua de Canet de Mar.
 
 
Mistral paire de totas las Mirèias
 
Divendres a 19h30 se tendrà la conferéncia entitolada “Frederic Mistral, lo paire de totas las Mirèias”, dicha per l’istorian Jaume Vellvehí, que presentarà l’escrivan occitan, son poèma Mirèia, e las repercussions en Catalonha de l’òbra mistralenca en general e de Mirèia en particular. La conferéncia se tendrà dins la sala audiovisuala del Pabalhon dels espòrts, que l’endeman aculhirà la Mòstra de cinèma occitan.
 
 
Maraton de cinèma occitan
 
Dissabte 24 se tendrà un maraton de cinèma occitan amb la projeccion de sièis filmes en lenga nòstra sostitolats en catalan.
 
— 11h30 En cap (6 min)
— 12h00 Vòutz de lo Sambuc (38 min)
— 13h00 Trobadors (52 min)
— 17h00 Cathare (28 min)
— 18h00 Lo sumi de la lenga vai a Montpelhièr (36 min)
— 19h00 Ibòs en Bigòrra. Entre mutacions e mites (54 min)
 
 
La Mòstra de Cinèma Occitan
 
Long de sas divèrsas edicions dempuèi l’an 2008, la Mòstra de Cinèma Occitan s’es consolidada coma un esplech de de promocion e divulgacion de la lenga e de la cultura occitanas e una veirina de la creacion audiovisuala en occitan. Ongan se ten dins 32 vilas de Catalonha e d’Occitània tota, d’Aran fins a las Valadas.
 
La Mòstra de Cinèma Occitan ofrís cada annada una vision panoramica de la lenga occitana a travèrs de las creacions audiovisualas. Quant als genres, i predomina lo documentari, entre d’autras formas d’expression cinematografica.
 
Organiza la Mòstra lo Departament de Cultura de la Generalitat de Catalonha, amb la collaboracion d’institucions e d’entrepresas catalanas e occitanas que ne facilitan la preséncia en territòri occitan e catalan. L’objectiu es de promòure la coneissença de la realitat de la lenga occitana en Catalonha e de n’encoratjar la creacion cinematografica.
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
2.

Com mes units...
l'Ernest, "El Tàrrega".

  • 1
  • 0
francesc palma
1.

La fraternitat catalano-occitana és bona,las duas lengas bessonas surten afavorides de los avanços d'ambdues parts.

  • 1
  • 0

Escriu un comentari sus aqueste article