Bandièra01 1180x150: Comuna de Tolosa

Actualitats

La Republica d’Armenia a festejat lo 25n anniversari de son independéncia

Vladimir Putin mandèt una letra de felicitacion a son omològ armèni, Serge Sargsian, en li desirant “patz, benèstre e desvolopament”

De milièrs de militars armènis de totes los còrses de l’armada participèron dimècres passat a una desfilada al centre vila d’Erevan per festejar lo 25 anniversari de l’independéncia d’Armenia de l’Union Sovietica après un referendum popular, çò rapòrta Geopolítica.cat.
 
Lo president rus, Vladimir Putin, mandèt una letra de felicitacion a son omològ armèni, Serge Sargsian, en li desirant “patz, benèstre e desvolopament”. En mai d’aquò, de soldats de la 102a division de la basa militara russa de Giumri, installada dempuèi mai de vint ans en Armenia, participèron tanben a la desfilada. “Las relacions entre Russia e Armenia, qu'an de prigondas raices istoricas, an a l’ora d’ara un caractèr estrategic e s’enriquisson amb de prometeires projèctes en divèrses domenis”, çò ditz la carta enviada pel cap del Kremlin a Sargsian.
 
Lo 21 de setembre de 1991, un mes après lo còp d’estat mancat per la direccion del Partit Comunista de l’URSS, lo 94,99% dels armènis se prononcièron per referendum en favor de l'independéncia de la republica. Dos jorns puèi, lo Sovièt Suprèm d’Armenia proclamèt l'independéncia del país.
 
“L'Union Europèa a sostengut e contunharà de sosténer lo desvolopament de las institucions democraticas solidas en Armenia, aital coma la prosperitat economica al benefici de totes los ciutadans del país”, çò ditz un comunicat del Servici Europèu d’Accion Exteriora (SEAE). “L'Union Europèa felicita la Republica d’Armenia e lo sieu pòble en lo vint e cinquen anniversari de la siá independéncia”, çò ajusta lo comunicat. “La Republica d’Armenia a experimentat un desvolopament considerable dins las darrièras annadas e nosautres, l'Union Europèa, esperam contunhar de trabalhar estrechament amb lo país dins lo futur”, çò conclutz.
 
Al delà de l’estat independent apelat Armenia, Armenia es istoricament un territòri pus vast que costeja Georgia al nòrd, Azerbaitjan a l'èst e al sud (amb l'enclava de Naxçıvan), Iran al sud e Turquia a l'oèst. Es lo país del pòble armèni e de la lenga armènia al sud de Caucàs.
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article