Bandièra01 1180x150: Comuna de Tolosa

Actualitats

Rugbi de XIII: Làmias-Tempèsta per la finala australiana

De Brutus a Sydney, en passant per Tolosa o Wigan, se’n marquèt ensages e ensages aquesta dimenjada tretzista

Pel primièr còp de lor istòria, las Làmias de Cronulla son en finala de l'NRL
Pel primièr còp de lor istòria, las Làmias de Cronulla son en finala de l'NRL
NRL: Làmias e Tempèsta en finala
 
En Australia, la tradicion es respectada. Lo titulari del trofèu cambia cada an dempuèi la creacion de la competicion en 1998. Los Vaquièrs, campions 2015, an pas res pogut en mièja finala contra las Làmias de Cronulla que menèron 32-6 abans de ganhar 32-20 e que son en finala pel primièr còp de lor istòria. Dins l’autra partida, l’ensag de l’èx-Dragon Whitehead per Canberra venguèt tròp tard per empachar la Tempèsta de Melbourne d’anar en finala: 14-12. Finala dimenge 2 d’octòbre a l’ANZ-Stadium de Sydney (9h30 del matin, - los oraris son balhats en ora occitana -; de seguir sus BeInSport).
 
 
Super League: Los Dragons acaban seisens
 
La dramatica marcha enrèire dels catalans contunhèt en aquesta darrièra jornada: l’esquipa sang e aur desmobilizada encaissèt un 48-24 a Wigan e daissèt la cinquena plaça a Castleford, victoriós contra Widnes: 40-26.
 
En ganhant cò d’Hull-FC 23-6, Warrington acaba la competicion coma cap de fila e reçauprà dijòus (21h,) en mièja finala St-Helens (victoriós de Wakefield: 32-12). L’autra aficha serà: Wigan-Hull-FC (divendres, 21 h).
 
D’aquel temps, los Catalans fan la granda ruscada amb un brave dotzenat de jogaires que se’n van: arrèst, rompeduras de contracte, non-renovelaments, signaturas endacòm mai... Los Dragons son en reconstruccion e auràn una figura novèla l’an que ven.
 
Dins lo 8 del Mitan, Brough passa lo tombat a qualques minutas de la fin e Huddersfield se salva la pèl 23-22 fàcia a Hull-KR. Aquestes jogaràn la partida de barratge decisiva per demorar en Superliga contra Salford (dissabte, 14h).
 
En U-19, cal anar al punt en aur per conéisser lo venceire del campionat: St-Helens bat Wigan 22-20 mercé a una penalitat a la 84a minuta.
 
 
Tolosa a una marcha del Championship
 
Dissabte, lo Tolosa Olimpic, remés de la finala de la Liga Una, recebiá York en barratge d’accession al Championship: l’emportèt largament 62-10. Dissabte, reçauprà Barrow dins la partida que caldrà pas mancar per ben capitar dins l’objectiu afichat: la montada en division superiora (partida a 15h, als Minims).
 
 
Elèit 1: la Dimenjada Magica lança lo Campionat
 
Brutus èra l’encastre de la Dimenjada Magica de l’Elèit 1. Dissabte, los Orses de Sent Gaudenç marquèron lor retorn dins la competicion bèla per una victòria sus Tolosa-Broncos: 16-10. Puèi, Vilanòva faguèt plegar Albi 24-22 e Lesinhan s’impausèt fàcia als catalans: 30-26.
 
Dimenge, Avinhon foguèt sens pietat per Palau 44-4 per prendre lo cap del classament e, dins lo revenge de la finala passada, Limós se mostrèt mai en cambas e mai organizat que l’AS Carcassona: 40-16.
 
Per la segonda jornada, quatre partidas se jogaràn dissabte: Palau-Tolosa, catalans-Avinhon, Carcassona-Albi, St Gaudenç-Vilanòva. Lo dèrbi Lesinhan-Limós se jogarà dimenge de vèspre al Molin.
 
La dimenjada veirà tanben la represa de las competicions Elèit 2 (Ferrals de Corbièras descobrirà la competicion del costat de Lion) e juniors U20.
 
 
Cronica occitana de XIII-Magazine: visca la Liga!
 
XII-Magazine entamena sa segonda sason amb lo n° de setembre (sus abonament: 38 € l’an; chèc a l’òrdre de Treize-Rugby-Events Axe-Sud 49, Grand carrièra Sant Miquèl, 31400 Tolosa), ont se trapa la cronica occitana seguenta:
 
“Visca la Liga! Non, vos cal pas pensar que vos vau parlar del jòc de palma redonda de l’autre costat de Pirenèus: parlarai plan de palma ovala! Quand lo rugbi passèt a 13, la federacion anglesa de l’esport novèl causiguèt lo tèrme de Liga. Es atal que se ditz en çò nòstre Liga pel 13 e tanben per la Federacion.
 
Es un polit mot que “liga” dins l’idèa e l’objectiu de se recampar, d’unir sos esfòrces per tirar totes dins lo meteis sens, per un projècte compartit, per presentar un front comun. Se ligar supausa d’èsser en bona ententa. Plan ligats, los avants butavan en mesclanha (ara, aquel esfòrç es un pauc desligat, atal van las causas!). Una esquipa plan ligada per l’amistat serà totjorn plan melhora qu’una còlha d’individualitats.
 
Las espigas dauradas se ligavan en garbas abans de venir palha e farina. Cal plan ligar la vinha (l’estiu, al temps ligaire): autrament, se poirà pas dintrar dins las tièras per vendémias. Se pòt ligar la salsa (amb farina barrejada docetament amb d’aiga o de bolhon dins una sieta per empachar los coquèls) per que lo plat siague mai requist. “Èsser de bona liga” es èsser respectable e respectat, balhar fisança.
 
Alara, ajam fisança: per defendre los dreits de nòstre rugbi, siaguèssem totes aligats e recampats per la Liga e pel 13! E, fin finala, lo rugbi, coma lo vin, desliga la lenga: fa parlar e, de còps, desparlar!”
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article