Bandièra01 1180x150: Comuna de Tolosa

Actualitats

Rugbi de XIII: Lo bloquièr NRL per las Làmias

Las Làmias s’empòrtan lo trofèu australian
Las Làmias s’empòrtan lo trofèu australian | NLR
Lo còr tretzista que pataqueja bravament en aquesta debuta d’octòbre amb las finalas d’NRL e de Superliga, las montadas e davaladas de division e lo lançament dels campionats d’Elèit.
 
 
NRL: Las Làmias mestrejan la Tempèsta
 
Dimenge, l’ANZ-Estadium de Sydney afichava complet per la finala NRL d’ongan entre un acostumat, la Tempèsta de Melbourne, e un convidat-suspresa: las Làmias de Cronulla. Las Làmias mordiguèron dins la partida per menar 8-0 a la pausa aprèp una penalitat de Maloney e un ensag de Barba al ras de la mesclanha transformat per Maloney. La Tempèsta accelerava son buf e preniá l’avantage a un quart d’ora de la fin aprèp un segond ensag transformat per Cameron Smith (Bromnwich 48ena, Chambers 63ena). Mas, cinc minutas mai tard, lo pilar Fifita capitava de desgatjar son braç entre quatre defensors e de pausar la palma als pès dels pals. Maloney ajustava la transformacion e las Làmias tenián lo còp fins a la còrna: 14-12 e primièra victòria per aquesta formacion dins la competicion NRL.
 
 
Superliga: finala en W
 
La Super-Liga a decidit de jogar la carta de la logica e de mandar las 2 formacions caps de fila en finala a Old-Trafford (aqueste dissabte 8, a 19h-ora occitana, retransmés per BeInSport): Warrington a batut St-Helens 18-10 e Wigan a ganhat contra una esquipa a l’arrèst dempuèi sa victòria en Cup: Hull-FC batut 28-18.
 
 
Victòria diabolica de Salford al punt en aur
 
Dins la pola del mitan, Leeds e Huddersfield avián salvat la plaça en Superliga e los Centurions de Leigh, ont signan los Dracs Pélissier e Maria, lo dreit de montar. Demorava una plaça en jòc dins la partida de barratge dissabte entre Hull-KR e Salford. Los locals menavan 12-10 a la pausa e aprèp un novèl ensag a la 56a minuta, Hull-KR se pensava salvat: 18-10 fins a la 79a minuta. Aquesta darrèra minuta foguèt ichcoquiana amb dos ensages marcats de tira per Salfòrd. Transformacions mancadas, egalitat a 18-18 e prolongacion. A la 84a minuta, Gareth O’Brien ajustava lo tombat e, sus la marca de 19-18, los Diables del president Kokash salvavan lor plaça en Superliga e daissavan una granda desesperança del costat d’Hull.
 
 
Tolosa pren l’ascensor
 
Dissabte, sus sa pelena dels Minims, lo Tolosa Olimpic a mestrejat son adversari del jorn, Barrow, per assegurar la montada en Championship (segond nivèl professional). Profitavan d’una inferioritat numerica anglesa per menar 6-4 a la pausa, puèi prenián un large avantatge a la represa 32-6. Tres ensages angleses en fin de partida cambiavan pas lo sòrt del rescontre (32-22 pels occitans) e empachavavan pas la montada esperada e programada dels tolosans al nivèl superior.
 
 
Elèit: Lesinhan cap de fila
 
L’Elèit 1 jogava sa segonda jornada. Dissabte, Vilanòva anèt ganhar a Sent Gaudenç 14-10; l’ASC estrilhèt Albi 53-12 e los Dragonets se mostrèron mai entreprenents qu’Avinhon: 44-18.
 
Dimenge, Palau signava una larga victòria sus Tolosa-Broncòs 40-12. Partida mai sarrada al Molin pel dèrbi entre FC Lesinhan e los campions limosencs. Los locals capitavan de gardar l’avantatge jos la calorassa de la debuta de l’autona: 12-10 e a prene atal lo cap del classament.
 
Pel compte de la tresena jornada, quatre partidas son programadas dissabte: Avinhon-Lesinhan (17h), Tolosa Bròncos-ASC (18h), Vilanòva-Dragonets (19h) e Albi-Sent Gaudenç (19h). La jornada se clavarà dimenge a l’Agulha amb l’oposicion entre Limós e Palau (15h30).
 
En Elèit 2, la formacion de Corbièras de Ferrals a marcat sa montada a aquel nivèl per una victòria a Lion: 25-14
 
Aqueste dimècres e aqueste dijòus, los Blaus preseleccionats per la partida contra Anglatèrra lo dissabte 22 a Avinhonse tornaràn trapar al Barcarés.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article