Un còp la finala de Superliga jogada, nos anam poder interessar de mai prèp als nòstres campionats d’Elèit e tanben a la sason internacionala amb lo França-Anglatèrra del 22 d’octòbre a Avinhon e lo torneg de las Quatre Nacions que seguirà.
 
 
Superliga: un trofèu de mai per Wigan
 
L’estadi Old-Trafford ramosèt mai de 70 000 espectators aqueste dissabte en debuta de serada per la finala 2016 de Superliga que metiá en confrontacion los primièrs del classament als punts: los Lops de Warrington e los segonds, los Combatents de Wigan. Aprèp sa desfaita contra Hull-FC en finala de la Cup, los Blau e Jaune de Warrington esperavan plan de marcar enfin lo nom de lor vila sul pè del trofèu de Superliga.
 
Wigan dobriguèt la marca sus penalitat, mas lo dobertura dels Lops Patton embrumava la defensa dels Roge e Blanc, puntava l’ensag e transformava. 6-2 pels Lops a la pausa. La partida èra nharruda, los placatges plan solides… A la 54a minuta, a la sortida d’un temps de dominacion dels Lops, lo segonda-linha Farrel, designat òme de la partida, trauquèt lo ridèu defensiu de Warrington e mandèt lo centre Gildart darrièr la linha per l’egalizacion. Dètz minutas mai tard, un còp de pè a ras de pelena de Sarginson, Charney recupèra la palma e, al prètz d’una pipa-redòla acrobatica, la depausa dins l’en-but estequit de l’estadi. Smith rajusta una penalitat e las darrièras atacas de Warrington pòdon pas empachar la novèla victòria de Wigan en Superliga: 12-6.
 
 
Elèit 1: un campionat dobèrt
 
En Elèit 1, cada formacion jòga sa particion e, per l’ora, se nòta un cèrt equilibri de las fòrças. Lesinhan s’acontenta d'entornar lo punt de bònus defensiu d’Avinhon: desfaita 16-20, la diferéncia de doas penalitats d’Arnaud. Sus la pelena dels Minims, Carcassona garda a distància los Bròncos de Tolosa 32-14. Los Dragonets prenon la mesura de Vilanòva en tèrra aquitana: 28-10. Albi se jòga dels Orses de Sent-Gaudenç: 50-20. Dimenge, Limós espèra las darrièras minutas per faire lo trauc a respècte de Palau: 36-20. En cap de classament, trapam sens suspresa Dragonets, Limós e Lesinhan.
 
Al programa de la quatrena jornada: tres partidas dissabte (Carcassona-Palau, Dragonets-Albi e lo dèrbi St-Gaudenç-Tolosa) e doas dimenge (Lesinhan-Vilanòva e Limós-Avinhon).
 
 
França-Anglatèrra, lo rendètz-vos d’Avinhon
 
Lo XIII de França demòra sus l’eliminacion de 2014 en vista del “Quatre nacions” d’ongan e la desfaita encaissada 84-4 fàcia a Anglatèrra l’an passat a Leigh. Lo chantièr es bèl per l’Aurelian Cologni tornarmai al cap de la formacion qu’aurà lo Remi Casty coma capitani. Los Blaus se son recampats dos jorns al Barcarés per preparar lo rendètz-vos d’Avinhon. Una lista de vint jogaires serà balhada diluns que ven, jogaires que prepararàn en tèrra provençala lo rendètz-vos d’Avinhon del 22. Se la partida serà retransmesa en dirècte sus L’Equipe 21, la Federacion espèra ça que la una mobilizacion bèla del pòble tretzista per emplenar las tribunas d’Avinhon.
 
En dobertura del rescontre, se tendrà l’oposicion entre las formacions femeninas. Un grop de 19 jogairas occitanas e catalanas es estat designat aprèp la jornada d’estagi del 1r d’octobre amb 35 participantas al CREPS de Lespinet.
 
Dissabte 15, amb Galas-Serbia e Russia-Espanha se dobrisson los dos torneges que qualificaràn tres esquipas europèas de mai per la Copa del Mond de 2017. Irlanda es dins lo grop de Russia e d’Espanha e Itàlia dins l’autre.
 
 
XIII e occitan
 
Dins una retransmission de BeInSport, Rodòlf Pirès e Loís Bonnery an insistit sus las riquesas linguisticas del XIII que permet de parlar anglés e francés, mas tanben occitan, catalan, fidjian, samoan,...
 
Lo divendres 21 d’octòbre, la formacion de Sent-Laurenç de la Cabrarissa organizarà sa serada de debuta de sason. En tota logica, aquesta serada se dirà: lo Dius-ac-vòl.
 
 
 
 
Alan Roch