Las 4-Nacions son vertadièrament un grand rendètz-vos tretzista, alara que la logica mestreja la 6a jornada del campionat d’elèit.
 
 
La valentisa escocesa e la fòrça australiana
 
A Workington, sus un terren cort e a l’èrba nauta, 7000 espectators seguigèron divendres en serada l’oposicion entre los Còrs Braves escoceses e los neozelandeses. E justament, los Blaus de las braias-mena tartan dintrèron sens complèxe e, pichon a pichon, compliquèron la vida a de Negres un pauc empruntats. Fusitu’a marcava a la 24ena (transformacion: Luke) mas tres minutas mai tard Tierney replicava. 6-4 pels Kiwis a la pausa. Danny Brough s’arregalava a la manòbra mas Fusitu’a marcava un segond còp (55a). Los Blaus jogavan al maximum cada palma: Helewel marcava (67a), Brough transformava e ajustava una penalitat: 12-10 per Escòcia. Los Negres auçavan enfin lo ton, puntavan dos ensages qu’èran pas transformats. E a doas minutas de la fin, lo centre Aitken preniá a contrapè la defensa neozelandesa. Lo pè de Brough tremolava pas per la transformacion. Egalitat a 18 pertot!
 
 
Escòcia mòstra que cal pas aver paur de las montanhas
 
Dimenge, a l’estadi olimpic de Londres, 36 000 espectators seguiguèron l’afrontament entre Austràlia e Anglatèrra. Lo dobertura anglés Windop dobrissiá la marca sus penalitat (10a) e Thurston li replicava (16a). Lo primièr ensag èra anglés per Mac Gillvary (25a), mas, a la pausa, aprèp un ensag de Ferguson (36a), la transformacion, puèi una penalitat sus la còrna de Thurston, los Cangorós menavan 10-6. A la 45a, Inglis espleitava un costat tampat sus sortida de mesclanha. Los angleses ensajavan de tornar faire lo retard, mas en tres minutas prenguèron un ensag en fòrça del pilar Scott (58a) e sul còp de remandadís, Cronk traucava la desfensa dels Blancs per un ensag signat Dugan. Amb las transformacions de Thurston, los Verd e Jaune avián pres lo larg: 28-6. La partida èra jogada, e dos ensages angleses e d’autres dos pels australians podián pas cambiar lo sòrt de la partida ganhada pels Cangorós: 36-18.
 
Dimenge que ven, la finala d’aqueste torneg de las 4 nacions, aurà per aficha a l’estadi d’Anfield Road a Liverpool (a 3 oras del vèspre, ora occitana; de seguir sus BeInSport), un plan classic Austràlia Nòva-Zelanda. La crida al titular de Brisbane Bennett coma entraïnaire a pas permés als angleses de passar un cap.
 
 
Dimenge 20, Canaris-Dragonets en cap d’aficha
 
Divendres 11 de novembre, la 6a jornada del campionat d’Elèit 1 se dobrissiá amb lo dèrbi catalan. A Sant Estève, los locals amb una fòrta colònia d’U-19 de la sason passada (mièg dotzenat) batián Palau 23-4 en s’envolant a l’ora de jòc. Lo campion Limós dispausava de Vilanòva 28-10. Dissabte, Albi menèt 22-10 a Avinhon mas perdèt 22-24. Dimenge, Lesinhan coneguèt cap de dificultat per dominar los Tolosa-Bròncos: 60-6 alara que Carcassona se deviá emplegar per daissar a distància Sent Gaudenç: 28-10.
 
Al programa de la setena jornada, tres rescontres dissabte: AS Carcassona-Dragonets en cap d’aficha, Tolosa-Avinhon e Albi-Vilanòva. Dimenge, los autres dos clubs audencs seràn en desplaçament: Lesinhan a Palau e Limós a Sent Gaudenç.
 
 
Un centre fidjian pels Dragons
 
La màger part de la formacion catalana de Superliga repren l’entraïnament aqueste diluns 14 de novembre. La fin de setmana a vist la signatura de dos jogaires: lo pilar occitan de Wakefield, Miquèl Simon, per refortir los avants e lo jove centre fidjian Brayden Wiliame que portava las colors de Manly en NRL.
 
 
 
 
Alan Roch