Aperaquí dètz mila personas manifestèron dissabte passat dins la vila d’Altsasu, de 7600 abitants, per revendicar la liberacion immediata dels nòu joves de la vila que son embarrats, acusats de terrorisme, a causa d’una bagarra que se tenguèt lo 15 d’octòbre passat entre aquestes joves e dos agents de la Gàrdia Civila sens unifòrme, a cinc oras del matin dins un bar de la vila.
 
Jol lèma “Altsasu”, los manifestants seguissián l’apèl de la comuna, de las familhas dels detenguts e de la plataforma “Altsatsuarra ta Harro” (Altsatsuenc e Fièr). Lo govèrn regional de Navarra tanben sostenguèt la protèsta que comptèt amb la participacion de sa pòrtavotz María Solana. Participèron tanplan la presidenta del Parlament de Navarra, Ainhoa Aznárez e de representants dels principals partits esquerristas.
 
A la fin, la maire d’un dels empresonats, qu’es menor d’edat, legiguèt un comunicat que soslinhava que “l’imatge de la vila [èra] grèvament damatjada” durant las darrièras setmanas. “Sèm una vila plurala e dobèrta, fruch de la convivéncia de fòrça personas que venguèron un jorn per i trabalhar e decidiguèron d’i demorar e de bastir aicí lor avenir en tot comprene la personalitat de la vila e en se l’apropriant”.
 
Tanben s’exprimiguèt lo chepic dels altsasuencs que sèt joves foguèsson encarcerats e d’autres dos jutjats, acusats de terrorisme e en tot riscar de penas de fins a 15 ans de preson. Un fach qu’a pas “cap de sens”, segon eles, qu’exigisson l’immediata liberacion dels detenguts. “Aviam pas jamai vist la vila tant unida, es incresable e esmovent”, çò remarquèron los organizaires. “Aiçò finís pas aicí , demòra fòrça trabalh a far. Volèm nòstres joves a l'ostal”, çò concluguèron.
 
De son costat, lo cònsol màger d’Altsasu, Javier Ollo, critiquèt que fòrça mèdias espanhòls aguèsson desformat l’imatge de la vila.