Coma cada 4 de decembre, los pompièrs d’Aran an festejat lor fèsta a l’escasença de Santa Barbara, qu’es lor santa patrona. Aimats e presats pel pòble e per las institucions, la fèsta dels pompièrs es totjorn un eveniment màger del país de cap de Garona.
 
La celebracion comencèt, coma d’abitud, amb la passejada dels camions dels pompièrs per las carrièras de vilas e vilatges en fasent sonar las sirenas. En mai de la messa e de l’omenatge als pompièrs mòrts, pompièrs, autoritats e ciutadans festegèron amassa dins lo pargue dels pompièrs de Vielha. Los actes foguèron presidits pel sindic d’Aran, Carlos Barrera, e pel secretari general d’Interior de la Generalitat de Catalonha, Cèsar Puig.
 
Barrera remembrèt l’importància dels pompièrs en Aran. “Era Val d’Aran a d’èster çò que tostemp a estat: un lòc que pòt dar responsa as sues emergéncies, as nòsti vesins, e que tanben auem d’arrecéber supòrt en moments critics que s’en poguen dar en nòste país”, çò manifestèt. En mai d’aquò faguèt un bilanç dels investiments faches ongan dins lo còrps que son a configurar l’actual sistèma d’urgéncias del país, que segon Barrera es a venir “un modèl d’emergéncies de succès e un referent d’aplicacion en d’auti territòris.”
 
De son costat, Puig soslinhèt lo sistèma pròpri d’urgéncias d’Aran e la gestion que faguèron en 2013 après los aigats. En mai d’aquò, saludèt lo sistèma pròpri d’Aran. “Contunharam parlant damb eth sindic d’Aran des peculiaritats qu’an d’auer es pompièrs d’Aran pera singularitat deth territòri, mos preocupe respectar aguesta singularitat e trapar era maximala eficiéncia pera prestacion deth servici. Nosati entenem qu’açò ei compatible e de ben segur que lèu traparam era formula e entre toti sabem qu’eth servici des pompièrs ei un servici excellent e de cara ath futur a d’auer modernitat. Mostrar era totau collaboracion deth Departament d’Interior damb eth Govèrn d’Aran”.