Lo cantaire e compositor britanic George Michael moriguèt lo jorn de Nadal als 53 ans a Oxfordshire (Reialme Unit). Segon un comunicat de la familha e de son representant, moriguèt tranquillament a l’ostal. Avèm pas d’informacions sus las causas de la mòrt. La polícia n’a escartat la violéncia. Sabèm qu’en 2011 patiguèt una grèva pneumonia a Viena e qu’èran tanben coneguts sos problèmas amb las drògas e l’alcòl.
 
Nascut a Londres lo 25 de junh de 1963 amb lo nom de Georgios Kyriacos Panayiotou, venguèt fòrça conegut dins los ans 1980 amb lo duo Wham. Mas son primièr grand succès foguèt l’album Faith, publicat en 1987, un dels disques mai venduts de l’istòria de la musica.
 
Après una longa omnipreséncia dins los mèdias, mai que mai coma victima de l’omofobia o a causa d’escàndols de sa vida personala, dont plusors arrestacions, tornèt èsser conegut per sos grands concèrts d’una qualitat musicala extraordinària mesa en valor per sa votz extrèmament personala.
 
Èra a mand d’enregistrar un nòu album. Long de sa carrièra, a vendut mai de cent milions de disques e es estat sèt còps lo numèro un de las vendas.
 
Un de sos grands succèsses foguèt justament la cançon Last Christmas I gave you my heart, valent a dire “A Nadal passat, te donèri mon còr”.