Aprèp la pausa piòta-chocolats-còca dels Reis-blanqueta, los campionats d’Elèit 1 e 2 de XIII dintran dins la fasa retorn: 9 partidas, una Dimenjada Magica per trapar los 6 qualificats per las fasas finalas. Objectiu: Narbona, lo 3 de junh.

 

 

Lesinhan-Avinhon en cap d’aficha

 

Pel compte de l’onzena jornada d’Elèit 1, un rescontre se debanarà dissabte: Dragonets-Vilanòva a Sant Estève. Dimenge de vèspre, seguiràn las oposicions Palau-Limós, St Gaudenç-Albi, Lesinhan-Avinhon (las tres a 15h) e Carcassona-Tolosa (16h).

 

En Elèit 2, dimenge, Montpelhièr qu’a reçauput los renfòrts de jogaires d’Arles, reçauprà Vilafranca. Las autras partidas: l’Escura-Bao, Entraigas-Lion e Carpentràs reçauprà los jogaires de Cabardés (Vilagalhenc-Argon)

 

 

La represa pels europèus

 

Las doas formacions implicadas dins las competicions europèas se traparàn dissabte 21 de genièr sus l’estadi de Blanhac: lo Tolosa Olimpic reçauprà los Dragons catalans a 4 oras del vèspre. En dobertura, se jogarà lo 1/8n de Copa entre Tolosa-Bròncos e Albi.

 

 

Lo camisòt de sosten al XIII

 

L’amassada financièra del 17 de decembre mostrèt que la Federacion se deuriá sarrar la cinta amb un trauc de 200 000 èuros daissat per la direccion precedenta.

 

La Federacion lança una crida als afogats de XIII per una crompa massissa de camisòts a 15 èuros l’un, marcats: “Staff Supporters”.

 

Dins un messatge, lo President Palanques nòta: “Los tretzistas: tot pòt arribar, mas sèm totjorn femnas e òmes dreits. Uèi, amb determinacion e fisança dins lo devenir, m’adreici a totas e totes los amoroses del XIII: “jamai lo rugbi de XIII a pas tant agut de besonh de sos sostens”. Sabètz doncas çò que vos demòra de faire…

 

 

 

 

Alan Roch