Bandièra01 1180x150: Comuna de Tolosa

Actualitats

La justícia obliga lo Parlament britanic a validar lo Brexit

La decision contèsta la fuèlha de rota de Theresa May que, la setmana passada, cercava un Brexit dur. La cort escarta que lo govèrn aja de besonh del consentiment dels parlaments d'Escòcia, d'Irlanda del Nòrd e de Galas per activar lo Brexit

La Cort suprèma de la Grand Bretanha estimèt ièr dimars que lo govèrn de Theresa May deuriá presentar lo Brexit al vòte de las Cambras dels Comuns e dels Lords. Aquela decision representa un còp als plans de May, que voliá activar l’article 50 del tractat de Lisbona en març que ven e aital començar de negociar la sortida de l'UE.
 
Lo procuraire general se mostrèt “decebut” per la decision, mas assegurèt que lo govèrn obesiriá a la senténcia. De tot biais, la Cort Suprèma a donat rason al govèrn en una autra seccion del recors. Segon los magistrats, May non deu pas comptar sul consentiment dels parlaments d’Escòcia, Irlanda del Nòrd e Galas per activar lo Brexit. Lo govèrn escocés a reclamat divèrses còps sa volontat de demorar dins l'Union, e aquel verdicte pòt donar un nòu vam a las voses que reclaman un nòu referendum d’independéncia.
 
Ara los deputats an la possibilitat —e mai s'es pauc probabla— de corregir o d’amortar la fuèlha de rota de la primièra ministra, que, fa una setmana, afirmèt que voliá un divòrci net e dur, en sortissent del mercat unic e en recuperant lo contraròtle de las frontièras. La data del vòte es pas encara publica.
 
Lo govèrn reclamava son drech d’utilizar la prerogativa reiala, que li permet de prene de decisions en nom de la Reina e sens consultar lo Parlament. Ça que la, lo tribunal s’es inclinat en favor del ròtle preeminent de las cambras sul de l’executiu. En novembre passat, una cort d’instància inferiora aviá ja dictat una senténcia similara, mas lo govèrn depausèt un recors davant la Cort Suprèma.
 
La demanda la presentèron un grop de personas dirigidas per Gina Miller, femna d'afars de la City de Londres. En segonda instància tanben s’i apondèt lo govèrn escocés de Nicola Sturgeon.
 
 


abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

La injusticia que vol manar mai que lo poble.

  • 1
  • 0

Escriu un comentari sus aqueste article