Bandièra01 1180x150: Comuna de Tolosa

Actualitats

Ucraïna: Kyiiv acusada de desplegar de sistèmas de missils contra la populacion civila

La comission d’enquèsta russa dispausariá d’elements de pròva que se seriá desplegat de sistèmas de missils Tochka-U (designacion OTAN dels SS-21 Scarab) contra la populacion civila a l’èst del país. Son de declaracions de la pòrtavotz del comitat, Svetlana Petrenko, qu’afirma que l’evidéncia de l’usatge dels sistèmas de missils e d’armas de destruccion massissa de la part de las fòrças armadas d’Ucraïna seriá “irrefutabla”.
 
Divendres passat, lo representant rus a l’Organizacion per la Seguretat e la Cooperacion en Euròpa (OSCE), Aleksander Lukashevich, aviá denonciat las autoritats de Kyiiv, en los acusant d’aver desplegat d’armas pesantas, de tancs e d’aver los sistèmas Tochka-U après la recenta deterioracion de la situacion dins lo país.
 
Tot l’airal oriental d’Ucraïna patís una situacion d’instabilitat prigonda e d’incertitud dempuèi abril de 2014, après que las autoritats a Kyiiv lancèron una operacion militara per recuperar lo contraròtle de la region de las milícias de las autoproclamadas republicas de Donetzk e Luhansk que sostenon l’independéncia de Donbass.
 
Per trobar una solucion a la crisi d’Ucraïna s’èra constituit lo nomenat Format de Normandia (amb la preséncia de França, Alemanha, Russia e Ucraïna, pren lo nom de la region francesa que foguèt lo sèti de la primièra reünion) que, gràcias al prètzfach que l’efectuèt Bielorussia, aviá donat luòc a la signatura dels acòrdis de Minsk.
 
Los acòrdis preveson d’arrestar los combats; la retirada de las armas sus la linha de contacte en Ucraïna orientala; l’escambi mutual de totes los presonièrs per las doas partidas; las reformas constitucionalas que conferisson un estatut especial a las republicas de Donetzk e Luhansk. Despuèi la signatura dels acòrdis, pasmens, las doas partidas s’acusan mutualament d’evitar de los aplicar.
 
La situacion, après la darrièra alta al fuòc decidida lo 21 de decembre, a pejorat dins las darrièras setmanas, particularament dins la vila d’Avdiivka, situada dins la zòna al còr de la linha de contacte contrarotlada per las autoritats de Kyiiv. Coma resultat dels intenses combats a Avdiivka, mai de 17 000 personas —dont 2500 enfants—s’afrontan a de condicions de gèl sens calfatge, electricitat ni aiga.
 
Divèrsas organizacions internacionalas, coma l’UNICÈF, se son activadas en exigissent un accès segur per menar a bon tèrme l’adobament immediat de l’infrastructura destrucha per tal d’evitar una sofrença pus granda de la populacion civila.
 
 
 
 
 
Aquesta nòva es adaptada de Geopolítica.cat amb qui Jornalet ten un acòrdi de cooperacion.
 
 
 
 
abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Los fachas de Kiiv e sos aliats europeus, e l'OTAN

  • 1
  • 1

Escriu un comentari sus aqueste article