Bandièra01 1180x150: Comuna de Tolosa

Actualitats

La geometria sagrada dels pueblos

Fins ara jamai degun aviá pas descobèrt qu’un pòble natiu nòrd-american poguèsse bastir de monuments amb una precision geometrica tan granda. Es çò qu’a fach Sherry Towers, de l’Universitat estatala d’Arizòna, al Temple del Solelh, situat al pargue nacional de Mesa Verda, en Colorado.
 
Las mòstras geometricas trobadas d’aqueste luòc son estonantas: de rectangles e tanben de triangles pitagoricians de 3:4:5 e eqüilaterals. A mai, la scientifica estatsunidenca a trobat l’utilizacion comuna d’una unitat de mesura qu’es estada utilizada per bastir tot l’ensems arquitectonic dels pueblos.
 
Entre las bastidas i an de mòstras de triangles de 45º, un triangle equilateral de 60:30:90, un rectangle d’or e divèrses triangles pitagoricians de 3:4:5. Un fach fòrça rar dins l’arquitectura nativa nòrd-americana. E mai se pensam qu’aqueste complèxe arquitectonic foguèt bastit pels pueblos fa mai de 800 ans.
 
E mai siá coneguda dempuèi longtemps, l’estructura en forma de D ja èra estada utilizada pels pueblos coma complèxe de ceremònias. Ara, la descobèrta, totun, es importanta pr’amor que las mesuras exactas del luòc èran pas conegudas. Se sabiá solament que i aviá de referéncias solaras e lunaras, e pro.
 
 
Un luòc sagrat pels pueblos
 
“Se sabiá qu’aqueste èra un centre important de ceremònias pels ancessors dels pòbles pueblos en tota la region. Aquò e tanben que s’i foguèsse efectuat d’observacions solaras èra un fach conegut per l’arqueologia —çò diguèt Towers—. Mas volguèri saber se tanben l’avián fach servir per observar las estelas. En tot descobrir que las meteissas mesuras èran utilizadas un còp e un autre, mon interès foguèt de mai en mai grand.”
 
Aital, la scientifica a confirmat que las mesuras utilizadas per bastir aqueste monument son comunas per un estudiant universitari: i a de triangles eqüilaterals, de cairats, de triangles de 45º, pitagoricians e tanben lo triangle d’aur, fòrça conegut pels arquitèctes de las ancianas Grècia e Egipte. Mas aquesta manièra d’utilizar la geometria èra utilizada tanben pels maias mas se sabiá pas que tanben o foguèsse pels pueblos.
 
Las mesuras son gaireben perfièchas. Lo marge d’error es mai pichon que l’1%. “Se demandèssem a una persona d’uèi lo jorn de bastir tornarmai lo luòc amb la meteissa precision en tot utilizar un pal e un tròç de còrda, las possibilitats d’o far tan plan coma o faguèron los pueblos serián minimas —çò soslinhèt Towers”.
 
Al delà d’aquò, Towers a trobat tanben de mòstras d’aquesta faiçon de bastir —en tot utilizar la geometria— en un autre luòc ceremonial dels pueblos, a Pueblo Bonito, al centre istoric nacional de la cultura chaco de Nòu Mexic. Aqueste foguèt bastit entre l’an 800 e 1100 après lo Crist, e a un rectangle a l’entorn de l’endrech amb un 1% d’error per rapòrt a un rectangle d’or. (Legissètz la seguida)
 
 

 
Aqueste article es  publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
3.

Abans de la conquesta d'America pels castellans, hi havia allà: mestres, ensenhaires, alumnes, escolas,religion,sacerdots,.... Creire que podien viure sense aquestas estructuras bàsicas, es demostrar una ignorancia i un despreci a los pobles d'abans. N'hi ha que diuen que las piramides las varen portar extraterestre. Non, foren eles que tenian una mena d'organitzacion, pas tan avançada coma la d'ara, e que la transmitien lo seu saber a sos fills. A base de molta de gent que cobraba pas res e que se los que manaven los agradava pas la feina que feian,los talhaven lo col. Mas beneits en aquel temps ,ho eran pas.

  • 1
  • 0
jp la rapieta
2.

#1

Es-quò possible de trobar un messatge ‘catat dins los alinhaments los mai pitiques, los mai vielhs, los mai grand de l’Istòria ?
Los quite nombre emarran beleu ‘na chausa ‘catada per lu dau pòple !

Dins lu filme aquí-junt, ‘nam montrar que quò se pòt i a mas d’arretrobar un molon d’informacion e les boirar per abusar dau colhon.

https://youtu.be/b5o9kMfgUvQ

  • 2
  • 0
lachaud
1.

I a un site en frances que parla de la geometria sacrada e de l'idéia que los sites megaliticas dau monde podan pas esser estat fach emben un burin e un marteu. Lo site s'apela nuréa TV.
I trobaretz Partice Poyard, Humberto Molinaro, Jacques Grimault, Howard Crowhurst e d'autres que z'esplican plan ben.

  • 2
  • 3

Escriu un comentari sus aqueste article