Bandièra01 1180x150: Comuna de Tolosa

Actualitats

Barcelona: de centenats de milièrs de personas an marchat per l’aculhença dels refugiats

Los manifestants denoncièron l’insensibilitat de las autoritats europèas davant lo drama dels milions de personas que fugisson lor país a causa de las guèrras o de la pauretat

| Anna Aroca
De centenats de milièrs de personas manifestèron dissabte passat a Barcelona per l’aculhença dels refugiats. La mobilizacion, qu’amassèt 500 000 personas segon los organizaires e 160 000 segon la polícia (ne jutjaretz segon los imatges), se debanèt darrièr tres bandeiròlas amb los lèmas:
 
— Pro de pretèxtes, aculhiscam ara!
— Pro de mòrts. Dobriscam las frontièras!
— Catalonha, país d’aculhença
 
Amb aquela marcha se clavava la campanha nomenada “Casa nostra, casa vostra” (cò nòstre, cò vòstre), qu’a organizat divèrsas activitats dins mai d’una vila del país e que faguèt un macroconcèrt revendicatiu la setmana passada.
 
Los manifestants exigiguèron de las institucions que compliguèsson lors engatjaments d’aculhença amb las personas refugiadas, e denoncièron l’insensibilitat de las autoritats europèas davant lo drama dels milions de personas que fugisson lor país a causa de las guèrras o de la pauretat, que son abandonadas a lor sòrt, en patissent la fam, lo freg e quitament la mòrt, dins lor long camin de trobar un endrech ont subreviure.
 
La protèsta finiguèt davant la mar Mediterranèa, la fòssa comuna pus granda d’Euròpa. Aquí, sus la plaja, lo grop de teatre La Fura dels Baus e l’ONG de socorristas Proactiva Open Arms, representèron un desbarcament de refugiats.
 
Sus l’empont parlèron doas refugiadas de Bòsnia e de Siria en explicar lors testimoniatges, e lo coordinator del movement Casa nostra, casa vostra, Ruben Wagensberg, felicitèt los acampats per aver fach possibla la manifestacion pels refugiats pus granda d’Euròpa. “Ciutadans, municipalitats, institucions, Generalitat: aculhiscam. Avèm lo dever e l’obligacion d’o far”, çò concluguèt.
 
 
De representants de totas las fòrças politicas, levat lo PP
 
Delà las principalas associacions de la societat civila, la protèsta tenguèt tanben de delegats de totas las fòrças politicas del Parlament de Catalonha, levat lo Partit Popular. Lo govèrn de la Generalitat de Catalonha i èra tanben representat, e sa vicepresidenta e pòrtavotz diguèt als mèdias durant la marcha que la situacion actuala èra deplorabla, que lo Principat de Catalona èra dispausat a aculhir, e qu’aviá doncas reclamat a l’estat espanhòl qu’aquò se metèsse en òbra. Dins aquel sens, la deputada de la CUP, Gabriela Serra, planguèt la crisi umanitària qu’a provocat que “la Mediterranèa siá un linçòl de 5000 mòrts”. En mai d’aquò, Serra demandèt al govèrn catalan que quitèsse de se retrencar darrièr Madrid, e que desobesiguèsse a l’estat per far possibla l’aculhença dels refugiats.
 
 
Un pache social contra lo racisme e la xenofobia
 
Après la manifestacion, lo president de Catalonha, Carles Puigdemont, acompanhat de qualques conselhièrs, recebèt los organizaires de la mobilizacion al palais de la Generalitat.
 
Los coordinators de Casa nostra, Casa vostra prepausèron al president un pache social contra lo racisme e la xenofobia. Demandan al govèrn de la Generalitat que s’engatge amb las municipalitats e las associacions per trobar lo biais de realizar l’aculhença dels refugiats sul pic, e tanben que se melhore l’atencion portada als immigrats que demòran ja en Catalonha.
 
Puigdemont se mostrèt fièr de la mobilizacion e publiquèt sus Twitter una fòto de son rescontre amb los organizaires en disent: “Uèi Catalonha torna mostrar al Mond sa melhora cara. Mercés a las tantas personas que fan entendre lo clam Volèm Acuhir”
 
 
 
De son costat, la consolessa de Barcelona, Ada Colau, publiquèt de fiuladas en catalan, espanhòl e anglès en se disent “fièra d’una vila qu’aima la vida e convertís la paur en esperança. Uèi Barcelona a dich al Mond que Volèm Aculhir”.
 
 
Tanben lo director del CIRDÒC, Benjamin Assié, èra present a la manifestacion e publiquèt sas impressions sus Facebook.
 

 
 
Dos còps mai de volontaris que de refugiats
 
La campanha “Casa nostra, casa vòstra” amassa a l’ora d’ara mai de 72 000 sostens de particulars e de mai de 900 d’associacions. De soslinhar las mai de 1200 personas que se son inscrichas per èsser de “mentòrs” dels refugiats.
 
A l’ora d’ara, en Catalonha, i a dos còps mai de volontaris que de refugiats.
 
 
De donadas vergonhosas
 
Aquela campanha mediatica a coincidit amb las donadas vergonhosas que ven de publicar l’Union Europèa, que meton en evidéncia que los estats membres de l’union an solament acceptat sus lor territòri una part infima dels refugiats que s’èran engatjats a aculhir.
 
A l’ora d’ara, los estats de l’UE an solament recebut 11 960 refugiats que provenon de Grècia e d’Itàlia, e mai se s’èran engatjats a n’acceptar 160 000. Aquela donada es clarament insufisenta se se pren en compte que pendent l’an 2016 arribèron 181 436 personas sonque en Itàlia.
 
 
Euròpa al caireforc
 
Sembla pas que la situacion siá a se melhorar dins los meses avenidors. Ongan i a d’eleccions dins los principals estats de l’UE, ont los partits xenofòbs e d’ultradrecha son a créisser, encara mai après lo Brexit e la victòria de Donald Trump als Estats Units.
 
Lo 15 de març que ven, i aurà d’eleccions als Païses Basses, ont lo xenofòb Partit per la Libertat de Geerd Wilders pòt venir la primièra fòrça. Lo 23 d’abril se tendrà lo primièr torn de la presidenciala francesa, ont Marine Le Pen pòt èsser la candidata pus votada —e los occitans n’aurem una bona part de responsabilitat—. Dins las eleccions alemandas de setembre, Alternativa per Alemanha pòt venir la tresena fòrça. En mai d’aquò, lo Reialme Unit començarà lo Brexit, qu’a centrat sa campanha sul contraròtle de l’immigracion.
 
Los resultats electorals pòdon marcar l’avenir d’Euròpa. Un sondatge de Chatham House, un dels thinktanks mai reconeguts, assegurava que lo 55% dels europèus èra en favor d’arrestar l’immigracion musulmana. Lo gra d’acòrdi a l’enebicion de lor l’intrada èra mai que mai naut en Polonha (71%) e en Ongria (64%), d’estats que participan pas mai a l’aculhença dels refugiats. Tanben èra de manièra inquietanta majoritari en Àustria (65%), Alemanha (53%) e Itàlia (51%).
 
Cal remarcar qu’a l’ora d’ara solament lo 7,6% de totes los refugiats del Mond se tròban dins l’UE, e que lo milion que i son arribats representa solament lo 0,2% de la populacion europèa. Dels 65,3 milions de refugiats e desplaçats del Mond, l’87% se tròba dins de païses en desvolopament, e la chifra es creissenta que, fa dètz ans, la proporcion èra del 70% contra lo 30%. Los estats qu’aculhisson mai de refugiats son Jordania, Paquistan, Iran, Etiopia, Kenya, Liban, Chad e Turquia.
 


abonar los amics de Jornalet
 
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
7.

NON A LA GUERRA DE SIRIA E A TOTAS LAS GUERRA, QUE SON LAS QUE PROVOCAN QUE HI HAGI TANTS DE REFUGIATS QUE FUGEN DE SOS PAISES.

  • 4
  • 0
Salusta Lo Bartàs
6.

#5 A tot aiceste contat sociologic, voldriái ajustar que, psicologicament, se me senti void, me senti tanben flac. Se me senti flac, lo contengut de l'Autre (la siá alteritat) me fica lo nas dins ma vacuitat. Atal el me sembla fòrt, mentre que ieu, me sembli feble, sens contengut, sens res. E d'ont ven que me sentisca void, a despart que me soi destacat de tota cresença, de tot ideal, e, mai que mai, de tota cultura tradicionala eiretada ?

Plan segur, lo saber m'a remplaçat la cresença. Òc-ben, al mens sus un plan intellectual ? Mas que ne vira, sus un plan psicologic ? Vacuïtat emocionala…

Plan segur, la luciditat m'a remplaçat l'ideal politic, e atal, las parlicalhas politicas non m'enganan pas mai. Mas, qué ne vira sus un plan psicologic ? Vacuïtat emocionala (m'enfotisme)… o, se que non, desanança, amargança, mesfisança, e, finala, páur e desfisança.

Plan segur, la cultura francesa de Paris, de Guy Lux, Jackie Sardou, Lagafe, Bigard, Patrick Sebastien a remplaçat los contes de ma grand la bòrnha. E qué n'ai retragut de melhor psicologicament ? Res per res ! Vacuïtat emocionala, e mai intellectuala (aquí, segur !!!).

Tota vacuïtat interiora (abséncia de contengut valedor accessible a la consciéncia) me dona a sentir l'alteritat coma una plenitud, illusòria de còps, mas a totes còps amenaçanta.

Non soi donc ges ni mica susprés de constatar que los Catalans non tenom tant d'aculhir l'Alteritat de l'Autre, dins la mesura que la vacuïtat panispanista es estada a çò sieu remplaçada per la plenitud catalana, l'alteritat interiora, l'Autre en se.

Se me senti remplit de contengut, la plenitud de l'Autre m'apareis coma un subjècte de curiosetat, coma un contengut preciós a escambiar tè tu tè ieu. Segon ieu, lo miracle catalan ten aicí a aiçò.

Conclusion, l'indispensable eiretatge del sègle dels lums es tanben eiretatge del las escuretats. Pas de lum sense ombra ni d'ombra sense lum.

  • 7
  • 2
Lo raiòu Cevenas
5.

#1 Aquel que çai vos escriu, es quauqu'us que pòt testimoniar de causas plenament viugudas, vist qu'a coneissegut, bien plaçat qu'èra pendent 20 ans, lo virament de la situacion socioeconomica de las banlègas.
Se i a d'egoïsme mai d'endividualisme fons en cò nòstre de segur, es pas solament aquò. Aquela manca d'aculhença es tanben la resulta dau lòng viugut d'una part de la populacion qu'es pas jamai estada escotada e qu'es totjorn estada tractada sus lo còp de "xenofòba" o de "faissista".
Benlèu qu'aquesta populacion a pas totjorn saupegut exprimir las causas emb de pro de manièira, confla d'èstre remandada a sa pretenduda entolerança.

E l'encausa d'aquesta resulta n'es los politicians mai que mai. Las rasons ?
- An totjorn laissat creire au mite de la França eternala dinc una França totjorn aitant centralizada ;
- Fan naturalizar despuèi mai de 30 ans d'estrangièrs que venguèron d'en prumièr faire la sanla òbra que los ciutadans francés voliáun pas pus faire ;
- Lo govèrn faguèt intrar e ne'n fai intrar encara (180 000 a 200 000 per an), ni per constatar que la situacion economica se poirissiá e se poirís un pauc mai chasca an ;
- Recampan los immigrats dinc los memes barris en laissant una ponhada de bandits i faire la lei de per las armas e la dròga ;
- Dinc aqueles barris, la superioritat en nombre dals nòrd e sud-africans fai que lo modus vivendi s'es tenchat de mai en mai de revendicacions, de marcaires identitaris e de biais de viure que se son a flor e mesura empausats als europencs e asiatics minoritaris ;
- Los politicians an pro sovent entretengut un discors sus l'occidentau secutaire e los nòrd e sud-africans victimizats (maugrat que i ague de vrai) ;
- L'economia dau país anant chorrant, an enfantilizat la populacion desfavorizada dals barris populars en mudant plan-plan la politica de solidaritat en politica d'assistanat per de paures venguts pauc a pauc encivics e profichaires (pas totes erosament !) ;
- An laissat creire au monde qu'an de drechs mès an sovent parlat a sota-votz dals devers ;

Dinc un contèxte economic que vai cabussant emb de 5 a 6 milhons de chaumaires, coma podèm encara aculir e naturalizar per an tant de monde, quand savèm perfectament que poirem pas lurs bailar a totes d'òbra ? En mai d'aquò sens aprestar la comunautat qu'aculís e sens apréner als novèls venguts lo modus vivendi majoritari dau país que el reçap ?
I a quicòm de fòrça irresponsable mès sustot un oportunisme silenciosament assumit per los politicians de drecha aitant coma de gaucha.
Ansin, la paraula negada de la populacion votant blanc o FN es estada mandada dirècte dinc los braces d'aqueste partit per encausa de la marrida fe dals autres partits. La vergonha siágue sus aquela gaucha-drecha, se lo FN sòrt victoriós de las eleccions presidencialas !

Mès tanben la vergonha sus nautres, autoctònes occitans o franchimands, qu'avèm pas totjorn agut lo coratge de reversar las margas per privilegiar l'òbra manuala e las pichòtas entrepresas. Savèm mens viure ensems, susar e trimar ensems. Ocupam de mens en mens l'espandi public de nòstras vilas. Avèm fòrça vendut nòstre patrimòni, avèm delaissat nòstre fons culturau, nòstres liams familhaus, nòstres rèires. Sèm venguts laugièrs, tebés, personaus e fariam repròchi als estrangièrs d'ocupar de per lurs bagatges identitaris l'espandi que laissam de voide ? Marrida fe !
Ara que nos trovam a l'espelir d'un entredos civilizacionau, los votaires FN reagisson emb d'anar quèrre lo materiau de lur presa de consciença dinc lo mite francés, per una recuperacion finalament faussada de lur identitat, de lur anma.

D'aquí enlai, avèm de mau per aculir de refugiats que, eles per còntra, se meritan d'èstre reçaupeguts en cò nòstre coma enquicòm mai. Que n'an francament de besonh !
Tròp d'immigracion sens justificacion economica mès tanben tròp de recèrca dau confòrt materiau an agut per consequença de tuar nòstre potenciau d'acuèlh de refugiats. O planhisse. Aicí es lo picar de la dalha, segon ieu.

  • 4
  • 0
lo menschevik georgian
4.

#3 donatz lei chifras e puei ne parlarem...

  • 5
  • 19
Jordi Badalona
3.

#2 A Catalunya tenim tanta població immigrada de tradució musulmana com teniu a Occitània, però per sort, no tenim tants racistes i xenòfobs com vós.

  • 19
  • 5

Escriu un comentari sus aqueste article