Bandièra01 1180x150: Comuna de Tolosa

Actualitats

Lo parlament italian autoriza un fons de 20 miliards d’èuros per salvar las bancas

La Cambra dels Deputats d’Itàlia ratifiquèt dijòus passat un decret lei per establir un fons de salvament que remeta a flòt las bancas; aquestas tenon 356 miliards d’èuros de crèdits dobtoses

La Cambra dels Deputats d’Itàlia aprovèt dijòus passat un decret lei per establir un fons de salvament de 20 miliards d’èuros destinats a la remesa a flòt de las bancas, que tenon 356 miliards d’èuros de crèdits dobtoses.
 
La Cambra Bassa ratifiquèt lo decrèt lei presentat lo 23 de decembre passat, aprovat ja pel Senat, amb una majoritat de 246 vòtes en favor, davant 147 contra, e 22 abstencions.
 
Lo fons de salvament, creat per l’executiu italian en seguida de l’aument falhit de capital de la Banca Monte dei Paschi di Siena, cèrca la recapitalizacion provisòria de la banca toscana e d’autras entitats del país amb de problèmas de capital, coma la Banca Popolare di Vicenza, Veneto Banca e Banca Carige, entre d’autras.
 
Dins aquel sens, lo primièr ministre d’Itàlia, Paolo Gentiloni, soslinhèt  sus Twitter que l’aprobacion parlamentària supausava “un pas endavant per garentir la seguretat economica de las familhas e de las entrepresas”.
 
Lo sector bancari de l’estat italian ten un total de 356 miliards d’èuros de crèdits improductius, dont 214 miliards d’èuros son impagats, segon lo darrièr rapòrt d’Estabilitat Financièra publicat per la Banca d’Itàlia.
 
La banca centrala expliquèt en decembre que lo salvament de Monte dei Paschi costarà al tresaur public un total de 6,6 miliards d’èuros —que l’Estada aquerirà una participacion superiora al 70% de l’entitat—, del temps que los autres 2,2 miliards d’èuros requerits per la Banca Centrala Europèa (BCE) los aportaràn d’investisseires institucionals.
 
Tanben, lo Govèrn d’Itàlia estudiariá la possibilitat d’injectar 5 miliards d’èuros a Veneto Banca e Banca Popolare a travèrs d’una “recapitalizacion provisòria” —lo meteis procediment utilizat amb Monte dei Paschi— per evitar las nòvas directivas europèas de recapitalizacion intèrna o “bail-in”, segon çò que raportèt Financial Times dimars passat.


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Los paures banquier que encara han tornat pas los diners que los governs los donaren, ara tornan a demandar mai diners. La dreta los hi dóna.

  • 3
  • 0

Escriu un comentari sus aqueste article